Tramp İrana yeni zərbələr endirəcəyi ilə hədələdi: Hörmüz boğazında gərginlik artır

ABŞ Prezidenti Donald Tramp İranın əsas neft ixrac mərkəzi olan Xark adasına yeni zərbələr endiriləcəyi ilə bağlı xəbərdarlıq edib.

“Operativ Məlumat Mərkəzi-OMM” xəbər verir ki, o, həmçinin müttəfiq ölkələri Hörmüz boğazında gəmiçiliyin təhlükəsizliyini təmin etmək üçün bölgəyə hərbi gəmilər göndərməyə səsləyib.

"NBC News"-a müsahibə verən Tramp, ABŞ-nin son zərbələrinin adadakı hərbi infrastrukturun böyük hissəsini məhv etdiyini vurğulayıb.

Münaqişənin üçüncü həftəsinə qədəm qoyduğu bir vaxtda tərəflər arasında gərginlik pik həddə çatıb.

İran tərəfi ABŞ və İsrailin hava hücumları dayandırılmayana qədər atəşkəsin mümkün olmayacağını bəyan edib. Eyni zamanda, İranın yeni Ali Rəhbəri Müctəba Xameneyi Hörmüz boğazının bağlı qalmalı olduğunu bildirib.

Tramp sosial media hesabında paylaşım edərək bildirib ki, ABŞ İranı hərbi və iqtisadi cəhətdən zəiflədib, lakin Hörmüz boğazından neft alan ölkələr bu keçidin təhlükəsizliyi üçün məsuliyyət daşımalıdırlar. Hazırda Böyük Britaniya və Fransa bölgədə təhlükəsizlik koalisiyasının yaradılması variantlarını müzakirə edirlər. Qlobal enerji bazarlarında isə tədarük zəncirindəki qırılmalar səbəbindən qiymətlər kəskin artmaqda davam edir.