Qazaxıstan Prezidenti Kasım-Jomart Tokayev Cənubi Qafqazın Avrasiyanın nəqliyyat sistemində artan əhəmiyyətini və Ermənistanın regional logistika dəhlizlərinə qoşulmasının vacibliyini qeyd edib.
"Operativ Məlumat Mərkəzi-OMM" xəbər verir ki, bu barədə o, "Armenpress" nəşrinə müsahibəsində deyib.
"Bölgədəki yeni marşrutlar Ermənistan və Qazaxıstanın ticarətini artırmağa kömək edəcək. 2023-cü ilin nəticələrinə görə, iki ölkənin ticarət həcmi 100 milyon dollardan bir qədər çox idi və son beş ildə 3,5 dəfə artmışdır. Ancaq bu həcmlər iki ölkənin potensialına uyğun gəlmir", - deyə Qazaxıstan prezidenti qeyd edib.
Tokayev bildirib ki, buna obyektiv səbəblər var.
"Bunlardan biri mürəkkəb logistikadır. İndi Qazaxıstan və Ermənistan arasında nəqliyyat əsasən avtomobil nəqliyyatı ilə həyata keçirilir ki, bu da ticarət imkanlarını əhəmiyyətli dərəcədə məhdudlaşdırır".
O hesab edir ki, regionda yeni marşrutların təşviqi ikitərəfli ticarət və iqtisadi əlaqələrin artmasına kömək edəcək.
