İrlandiyada magistral yolda əks istiqamətdə hərəkət edən avtomobilin başqa bir maşınla toqquşması və nəticədə beş gəncin həyatını itirməsindən sonra sosial media platforması "TikTok"un fəaliyyəti ilə bağlı araşdırma başlanıb.
“Operativ Məlumat Mərkəzi-OMM” xəbər verir ki, bununla bağlı xarici KİV məlumat yayıb.
Bildirilib ki, Kildare bölgəsindəki M9 magistralında baş verən qəza zamanı Dublin hava limanına gedən digər avtomobildəki üç qadın və bir uşaq ağır xəsarət alaraq xəstəxanaya çatdırılıb.
Polis əməkdaşları bildiriblər ki, gənclər sosial şəbəkələrdə “bəyənmə” və digər qarşılıqlı əlaqələr toplamaq məqsədilə gecə saatlarında avtomobillər oğurlayır, onları əks istiqamətdə idarə edir və təhlükəli anları "TikTok"da paylaşırlar. Polis bu təhlükəli trendi yayan qruplara qarşı mübarizə apardıqlarını açıqlayıb.
İrlandiya Media Tənzimləmə Qurumu (Coimisiún na Meán) qanunsuz məzmun və təhlükəli sürücülük videolarına qarşı hansı tədbirlərin görüldüyünü öyrənmək üçün "TikTok" rəhbərliyi ilə əlaqə saxlayıb.
Qurum platformadan qaydaları pozan məzmunların necə müəyyən edildiyi, insan nəzarətinin artırılıb-artırılmadığı və cinayətlə bağlı məlumatların polisə təqdim edilib-edilmədiyi barədə açıqlama tələb edib.
"TikTok" hesablarına aid profillərdə polislə təqiblərin və avtomobil oğurluqlarının görüntülərinin yayımlandığı bildirilir.
Platformanın nümayəndələri isə qaydaları pozan hesab və videoların silindiyini açıqlayıblar.
İrlandiyanın Baş naziri Micheal Martin sosial şəbəkələrdə “bəyənmə” toplamaq naminə həyata keçirilən təhlükəli sürücülüyə heç bir şəkildə dözümlülük göstərilməyəcəyini bildirib.
Polis Nümayəndələri Assosiasiyasının rəsmiləri isə gənc qrupların sosial mediada daha çox diqqət çəkmək üçün bir-biri ilə yarışdığına diqqət çəkərək valideynlərə xəbərdarlıq ediblər.
