OMM Redaksiyası
Azərbaycan tennisçisi Tamerlan Əzizov peşəkar karyerasında mühüm nəticəyə imza atıb. O, “M15 Baku” beynəlxalq tennis turnirində ilk oyununu qələbə ilə başa vuraraq növbəti mərhələyə yüksəlib.
Bu nəticə Əzizova karyerasında ilk ATP reytinq xallarını qazanmağa imkan verib. Tennisçi xalları həm fərdi, həm də cütlər yarışında əldə edib.
Beləliklə, Tamerlan Əzizov ilk dəfə ATP reytinqinə daxil olub. O, hazırda həm tək, həm də cütlər üzrə ATP reytinqində yer alan yeganə Azərbaycan tennisçisidir.
ATP xalları tennisçilərə rəsmi turnirlərdəki nəticələrinə əsasən verilir. Oyunçu yarışda irəlilədikcə, qazandığı xalların sayı da artır. Tək və cütlər yarışlarında reytinq xalları ayrıca hesablanır.
ATP reytinqi tennisçilərin son 52 həftə ərzində topladığı xallar əsasında formalaşır və onların müxtəlif turnirlərdə iştirak imkanlarına təsir göstərir.
