ABŞ-də dələnin səbəb olduğu ehtimal edilən yanğın ailəni evsiz qoyub.
"Operativ Məlumat Mərkəzi-OMM" xəbər verir ki, bu barədə "Daily Star" qəzeti məlumat yayıb.
Məlumata görə, ABŞ-də bir ailə çardaqda elektrik naqillərini dişləyən dələnin qısaqapanmaya səbəb olduğu iddia edilən yanğın nəticəsində evini itirib.
Donni Banta və Steysi Deyvis iki övladı ilə birlikdə yatarkən yanıq qoxusuna oyanıblar. Ev sahibinin sözlərinə görə, əvvəlcə elektrik açarının səsini eşidib, daha sonra çardaqdan gələn səs-küy və yanan naqillərin spesifik qoxusunu hiss edib. Ailə uşaqları və ev heyvanları ilə birlikdə dərhal evi tərk etməyə nail olub.
Panama Siti yanğınsöndürənləri hadisə yerinə gələrək alovu söndürüblər. Lakin bina və içərisindəki əşyalar demək olar ki, tamamilə yararsız hala düşüb. İlkin ehtimala görə, yanğına elektrik naqillərinin zədələnməsi səbəb olub və dələnin naqilləri dişləyərək qısaqapanmaya yol açdığı güman edilir.
