OMM Redaksiyası
Çoxqat dünya çempionu, amerikalı üzgüçü Şeyn Kasas Bakıdakı çıxışını ümumilikdə uğurlu hesab edir. O, bəzi nəticələrindən razı qaldığını, bəzilərinin isə istədiyi kimi olmadığını bildirib.
Kasas yarışın son günündə 200 metr məsafəyə sərbəst üsulla üzmə yarışında qızıl medal qazanıb. İdmançı yüksək səviyyəyə çatmaq üçün prosesə səbirli yanaşmağın vacibliyini vurğulayıb. Onun sözlərinə görə, irəliləyişini tənqid etməkdənsə, hər gün kiçik addımlarla inkişaf etməyə çalışmalıdır.
Amerikalı üzgüçü qarşıdakı bir il yarım-iki il ərzində ən yüksək səviyyədə çıxış etməyi hədəfləyir. Kasas düşünür ki, ardıcıl yarışlarda iştirak nəticələri dərhal təhlil etməyə və lazımi dəyişiklikləri etməyə imkan verir. O, heç bir məşqin yarış təcrübəsini tam əvəz edə bilməyəcəyini qeyd edib.
Kasas “İpək Yolu” seriyasının növbəti mərhələlərində də mübarizə aparacağını bildirib. O, Azərbaycanda yaxşı qarşılandıqlarını, ekskursiyalarda iştirak etdiklərini, görməli yerləri gəzdiklərini və kartinq sürdüklərini deyib. Üzgüçü yarışlardan kənar xoş xatirələrin də onun üçün əhəmiyyətli olduğunu, eyni zamanda hər gün diqqətini maksimum cəmləməyə çalışdığını vurğulayıb.
