OMM Redaksiyası
Səudiyyə Ərəbistanının beynəlxalq istirahət turizmi sənayesinin 2025-2030-cu illər arasında 93 faiz artacağı gözlənilir. Bu barədə Ər-Riyadda keçirilən "WTM Spotlight Riyadh" tədbirində məlumat verilib.
İllər ərzində Səudiyyə Ərəbistanı beynəlxalq aləmdə əsasən dini turizm məkanı kimi tanınıb. Hər il 2-3 milyon müsəlman ibadət üçün Məkkəyə səfər edir.
Lakin ölkənin "Vision 2030" planı çərçivəsində turizm, əyləncə və istirahət əsas inkişaf istiqamətlərinə çevrilir. Bu dəyişiklik Ər-Riyadda yeni turizm və əyləncə layihələrinin həyata keçirilməsində də özünü göstərir.
"Tourism Economics" şirkətinin EMEA üzrə idarəedici direktoru Deyv Qudcer bildirib ki, Səudiyyə Ərəbistanı dünyanın ən dinamik ziyarətçi iqtisadiyyatlarından birinə çevrilib. Ölkə 2019-cu ildən bəri qlobal səyahət artımının təxminən 15 faizini təmin edib və Yaxın Şərqdəki artımın dörddə üçünə töhfə verib.
Beynəlxalq istirahət xərclərinin ümumi turizm xərclərindəki payı 2019-cu ildəki 9 faizdən 2025-ci ildə 28 faizə yüksəlib. Bu göstəricinin 2030-cu ilədək 31 faizə çatacağı proqnozlaşdırılır. Çin də daxil olmaqla beynəlxalq bazarlarda ölkəyə marağın artacağı gözlənilir.
"Hilton" şirkətinin beynəlxalq otellər üzrə bazar meneceri Səid Əl-Cəbri krallığın şimal və cənub bölgələri, eləcə də Qırmızı dəniz sahilindəki layihələrin böyük potensiala malik olduğunu qeyd edib. Onun sözlərinə görə, regional gərginliklər ziyarətçi artımını yavaşlatsa da, təsir ilkin gözləntilərdən daha az olub.
Turizmdəki genişlənmə mehmanxana sektorunda da yeni imkanlar və təzyiqlər yaradır. "STR" şirkətinin proqnozuna əsasən, 2027-ci ildə Ər-Riyadda mövcud otaq başına gəlirin 18,6 faiz artacağı gözlənilir. Korporativ və konsaltinq xidmətlərinə tələbin yeni mehmanxana təklifini üstələyəcəyi bildirilir.
Ciddədə isə daxili və beynəlxalq tələbat bazarı dəstəkləməkdə davam edir. Şəhər yay turizmi məkanı olmaqla yanaşı, Həcc və Ümrə zəvvarları üçün tranzit mərkəzlərindən biridir. Bununla yanaşı, 2027-ci ildə ölkədə 2 300-dən çox yeni mehmanxana otağının istifadəyə veriləcəyi gözlənilir.
"RX" şirkətinin BƏƏ üzrə regional portfel direktoru Danielle Körtis Səudiyyə Ərəbistanında dəyişikliklərin sürətini və miqyasını səyahət sənayesi üçün olduqca maraqlı dövr kimi qiymətləndirib. "WTM Spotlight Riyadh" tədbirinin məqsədi bazar haqqında məlumatlılığı artırmaq və beynəlxalq tərəfdaşlıqların qurulmasına kömək etməkdir.
