Çin idmançısı şahmat üzrə 17-ci dünya çempionu olub.

"Operativ Məlumat Mərkəzi-OMM" xəbər verir ki, çinli qrossmeyster Din Lijen şahmat üzrə dünya çempionu adı uğrunda tay-breyk görüşünün Astanada keçirilən dördüncü oyununda rusiyalı Yan Nepomnyaşini qara fiqurlarla məğlub edib.

Klassik vaxta nəzarətlə keçirilən 14 oyundan sonra hesab bərabərləşib - 7:7. Belə olduqda sürətli şahmat üzrə əlavə dörd oyunu təyin edilib. İlk üç oyun heç-heçə yekunlaşıb.

Nəhayət sonuncu partiya çinlinin xeyrinə başa çatıb. Rusiyalı 68-ci gedişdə məğlubiyyətini etiraf edib.

Azərbaycanın qadın güləşçisi Mariya Stadnikin atası Vasili Stadnik rəhmətə gedib.

"Operativ Məlumat Mərkəzi-OMM" xəbər verir ki, bu barədə Azərbaycan Güləş Federasiyasının mətbuat xidməti məlumat yayıb.

O, uzun sürən xəstəlikdən sonra bu gün dünyasını dəyişib.

Qeyd edək ki, Mariya Stadnik 4 qat olimpiya medalçısı, 2 qat dünya və 10 qat Avropa çempionudur.

Azərbaycan cüdoçuları Polşanın Radom şəhərində keçirilən Avropa Kata turnirində fəxri kürsüyə qalxıblar.

Azərbaycan Cüdo Federasiyasından "Operativ Məlumat Mərkəzi-OMM"-ə verilən məlumata görə, yığmanın heyətində İsmayıl Rzayev (tori / hücum edən idmançı) və İbrahim Aslanov (uke / hücum edilən idmançı) bürünc medal qazanıblar.

Onlar böyüklər arasında “Nage-no-Kata” üzrə 353,5 xal toplayaraq buna nail olublar.

Qeyd edək ki, bu, Azərbaycan cüdo tarixində katada əldə edilən ilk medaldır.

Azərbaycanın yunan-Roma güləşçisi Murad Məmmədov (60 kq) Paris-2024 Yay Olimpiya Oyunlarına lisenziya qazanıb.

"Operativ Məlumat Mərkəzi-OMM" xəbər verir ki, 28 yaşlı idmançı buna Türkiyənin İstanbul şəhərində keçirilən Dünya Olimpiya Təsnifat turnirində finala vəsiqə qazanmaqla nail olub.

O, yarımfinal mərhələsində Razvan Arnauta (Rumıniya) qalib gəlib.

Beləliklə, Azərbaycan olimpiadaya 21-ci lisenziyanı qazanıb.

“Cəlilabad” komandası daha iki əcnəbi basketbolçu ilə yollarını ayırıb.

"Operativ Məlumat Mərkəzi-OMM" xəbər verir ki, bölgə təmsilçisi gürcüstanlı Levan Qoqaladze və ABŞ-dan olan Raşon Consonla vidalaşıb.

“Cəlilabad” daha əvvəl amerikalı Camani Pirs və Kobi Tomasla başa çatan müqavilənin müddətini uzatmayıb.

Qeyd edək ki, “Cəlilabad” müntəzəm mövsümü 23 xalla səkkizinci pillədə bitirib və pley-offa vəsiqə qazana bilməyib.

Heydər Əliyev Fondunun təşəbbüsü ilə keçirilən “Bakı Marafonu-2024”ün qalibləri müəyyənləşib.

"Operativ Məlumat Mərkəzi-OMM" xəbər verir ki, “Küləyə qalib gəl” şüarı altında keçirilən Bakı marafonunda qadınlar arasında ukraynalı Nataliya Semenoviç birinci olub. Azərbaycan təmsilçisi Anna Yusupova marafonu ikinci, qazaxıstanlı Nelli Qaitova üçüncü pillədə başa vurublar.

Kişilərin mübarizəsində türkiyəli Ahmet Alkanoğlu finişə hamıdan tez çatıb. İkinci yeri ukraynalı Boqdan Semenoviç, üçüncü yeri uqandalı İsmail Senyange tutublar.

İlk 3 yerin sahiblərinə, müvafiq olaraq, 3000, 2000 və 1000 manat pul mükafatları, medal və diplomlar təqdim olunub.