Milli Məclisin Mətbuat və ictimaiyyətlə əlaqələr şöbəsindən verilən məlumata görə, iyunun 2-də Serbiyada səfərdə olan parlament sədri Sahibə Qafarova bu ölkənin Milli Assambleyasının sədri Ana Brnabiçlə görüşüb.
Görüş zamanı Serbiya Milli Assambleyasının sədri Ana Brnabiç Azərbaycanın Serbiya üçün dost və müttəfiq dövlət olduğunu vurğulayaraq, ikitərəfli münasibətlərin dinamik inkişaf etdiyini bildirib.
Sahibə Qafarova öz növbəsində Parlamentlərarası İttifaqın Qadın Parlamentarilərin Qlobal Konfransının yüksək səviyyədə təşkil olunduğunu qeyd edib və bu kimi tədbirlərin aktual problemlərin müzakirəsi üçün əhəmiyyətli platforma olduğunu diqqətə çatdırıb.
Spiker, həmçinin iki dost və strateji tərəfdaş ölkə arasında ali səviyyəli səfərlərin roluna toxunaraq, Prezident İlham Əliyev və Prezident Aleksandar Vuçiçin qarşılıqlı səfərlərinin, eləcə də bu çərçivədə imzalanan sənədlərin əməkdaşlığın inkişafındakı önəmini vurğulayıb.
Tərəflər görüşdə parlamentlərarası əlaqələrə dair qarşılıqlı maraq doğuran digər məsələlər ətrafında da fikir mübadiləsi aparıblar.
