Mayın 29-da Azərbaycanda hava şəraitinin dəyişkən olacağı proqnozlaşdırılır. Milli Hidrometeorologiya Xidmətinin verdiyi məlumata görə, Bakıda və Abşeron yarımadasında hava əsasən dəyişkən buludlu olacaq. Gündüz saatlarında yağmursuz hava şəraiti müşahidə edilsə də, axşama doğru bəzi yerlərdə yağış yağacağı gözlənilir. Gecə saatlarında yarımadanın ayrı-ayrı ərazilərində yağıntıların intensivləşəcəyi və şimşək çaxacağı ehtimal olunur.
Bakı və Abşeron yarımadası üzrə göstəricilər:
- Havanın temperaturu: gecə 17-20°, gündüz 22-27° isti.
- Külək: Cənub-şərq küləyi axşama doğru güclü şimal-qərb küləyi ilə əvəzlənəcək.
- Atmosfer təzyiqi: 756 mm civə sütunundan 750 mm civə sütununa enəcək.
- Nisbi rütubət: gecə 70-75%, gündüz 60-65%.
Azərbaycanın rayonlarında isə günün birinci yarısı əsasən yağmursuz keçəcək. Lakin gündüz saatlarından etibarən şimal və qərb rayonlarından başlayaraq fasilələrlə yağıntıların düşəcəyi gözlənilir. Bəzi yerlərdə yağışın intensiv və güclü olacağı, şimşək çaxacağı, dolu düşəcəyi, yüksək dağlıq ərazilərdə isə qar yağacağı ehtimal edilir. Gecə və səhər saatlarında duman müşahidə olunacaq, qərb küləyi isə bəzi yerlərdə arabir güclənəcək.
Rayonlar üzrə temperatur proqnozu:
- Düzən rayonlarda: gecə 16-19°, gündüz 26-31° isti.
- Dağlıq ərazilərdə: gecə 7-12°, gündüz 16-21°, bəzi yerlərdə 23-26° isti.
