Rusiyanın “İrAero” aviaşirkəti Permdən Bakıya birbaşa uçuşlara start verir.

 "Operativ Məlumat Mərkəzi-OMM" xəbər verir ki, uçuşlar mayın 30-dan başlayacaq.

100 sərnişin tutumuna malik “Superjet” təyyarələri həftədə bir dəfə - çərşənbə axşamı Permdən Bakıya uçacaq.

"Bolşoye Savino" hava limanının cədvəlinə uyğun olaraq, Permdən Bakıya uçuş proqramı oktyabrın 24-dək nəzərdə tutulub.

Vətəndaşlar öz avtomobilləri ilə Laçın şəhərinə səfər edə biləcəklər.

"Operativ Məlumat Mərkəzi-OMM" xəbər verir ki, bu barədə Rəqəmsal İnkişaf və Nəqliyyat Nazirliyi və Dövlət Turizm Agentliyinin birgə məlumatında bildirilir.

Məlumatda deyilir ki, “Böyük Qayıdış” proqramının tərkib hissəsi olaraq Azərbaycan vətəndaşlarının işğaldan azad edilmiş ərazilərə səfərlərinin istiqamətləri genişləndirilir.

27 aprel 2024-cü il tarixindən etibarən vətəndaşlar fərdi minik avtomobilləri ilə Şuşa şəhərinə və Suqovuşan qəsəbəsinə səfərlə bərabər, artıq Laçın şəhərinə də səfər edə biləcəklər. Vətəndaşlar səfər üçün icazəni 26 aprel tarixindən başlayaraq “Yolumuz Qarabağa” portalı (www.yolumuzqarabaga.az) üzərindən əldə edə bilərlər. Rəsmiləşdirilən icazələrin etibarlılıq müddəti 2 gün nəzərdə tutulub. Laçın şəhərinə səfər Füzuli rayonunun Alxanlı keçid məntəqəsindən daxil olmaqla “Zəfər Yolu” və Horadiz qəsəbəsindən keçməklə Cəbrayıl – Zəngilan – Qubadlı – Laçın marşrutu ilə mümkün olacaq.

Fərdi minik avtomobillərində səfər üçün 1 sürücü olmaqla maksimum 9 nəfərə icazə alına bilər. Fərdi minik avtomobilləri dedikdə, Azərbaycan Respublikası avtomobil dövlət qeydiyyat nişanına malik, B kateqoriyasına uyğun nəqliyyat vasitələri nəzərdə tutulur. Fərdi minik avtomobillərini idarə edən şəxslər “Yolumuz Qarabağa” portalı üzərindən səfərlə bağlı qaydalar, mina təhlükəsizliyi barədə maarifləndirici məlumatlarla tanış olmalı, həmçinin bu barədə səfər edən şəxsləri məlumatlandırmalı, mina təhlükəsizliyinə əməl etmək üçün işğaldan azad edilmiş ərazilərə daxil olduqdan və müvafiq yoxlanışdan keçdikdən sonra marşrutdan kənara çıxmamalı, yolayrıcılarında diqqətli olmalı və səfər marşrutu boyunca qaydalara əməl etməlidirlər.

Vətəndaşlar səfərdən öncə portalda yerləşdirilmiş mehmanxana və digər yerləşmə məntəqələri ilə əlaqə saxlayıb otaq sifarişlərini həyata keçirə bilərlər.

Rusiyanın “IrAero” aviaşirkəti V.P. Çkalov adına Nijni Novqorod Beynəlxalq Hava Limanından Bakıya birbaşa müntəzəm reyslər həyata keçirməyə başlayıb.

Bu barədə "Operativ Məlumat Mərkəzi-OMM" Hava Limanına istinadən xəbər verir.

Məlumata görə, Azərbaycanın paytaxtına bütün yaz-yay cədvəli üzrə həftədə bir dəfə, cümə axşamı “Sukhoi Superjet 100” təyyarəsi ilə uçuşlar planlaşdırılır.

Nijni Novqoroddan Bakıya uçuşlar Rusiya vaxtı ilə saat 01:00-da həyata keçirilir. Təyyarə Azərbaycana saat 05:00-da çatacaq.

Heydər Əliyev Beynəlxalq Aeroportundan geri dönüş reysi həftədə bir dəfə, çərşənbə günləri saat 21:00-da, Çkalov Beynəlxalq Hava Limanına eniş isə saat 23:00-da həyata keçirilir.

Bu ilin yanvar-mart aylarında Bakıda 3, 4 və 5 ulduzlu hotellər üzrə onlayn bronlaşdırma sistemi olan booking.com-da qeyd olunan orta qiymətlər açıqlanıb.

"Operativ Məlumat Mərkəzi-OMM" Dövlət Turizm Agentliyinin hesabatına istinadən xəbər verir ki, 3 ulduzlu hotellərdə bir gecə qalmaq üçün orta qiymət 75 manat, 4 ulduzlu hotellərdə orta qiymət 108,6 manat, 5 ulduzlu hotellərdə isə 236, 9 manat təşkil edib.

Qiymətlər, ötən ilin eyni dövrü ilə müqayisədə 3 ulduzlu hotellər üzrə 33 %, 4 ulduzlu hotellər üzrə 30 % azalıb, 5 ulduzlu hotellər üzrə isə 25 % artıb.

Bayram tətili günlərində milli parkları 3 540 nəfər turist ziyarət edib.

Bu barədə "Operativ Məlumat Mərkəzi-OMM"-ə Bioloji Müxtəlifliyin Qorunması Xidmətinin rəsmisi Arzu Babayeva məlumat verib.

O qeyd edib ki, həmin günlər ən çox turist qəbul edərək ilk üçlükdə Göygöl, Şirvan və Abşeron milli parkları olub.

Azərbaycan və Rusiya arasında turizm əlaqələri müzakirə olunub

Dövlət Turizm Agentliyindən "Operativ Məlumat Mərkəzi-OMM"-ə verilən xəbərə görə, martın 7-də Agentliyin sədri Fuad Nağıyevlə Rusiya Federasiyasının iqtisadi inkişaf naziri Maksim Reşetnikov arasında görüş keçirilib.

Görüşdə Dövlət Turizm Agentliyinin sədri Fuad Nağıyev dövlət səviyyəsində turizm sahəsinin inkişafına xüsusi diqqətin ayrıldığını, 2023-cü ildə xarici ziyarətçilərin sayında 2022-ci illə müqayisədə 30 faiz artımın olduğunu qeyd edib. O, Rusiyanın Azərbaycan üçün mühüm turizm bazarı olması, Rusiya vətəndaşlarının 2023-cü ildə gələn ziyarətçilərin 30%-ni təşkil etməsi, iki ölkə arasında turizm sahəsində çoxtərəfli əməkdaşlıq potensialının mövcudluğunu vurğulayıb. Agentlik sədri, həmçinin 5 mart 2024-cü il tarixində imzalanmış turizmə dair ikitərəfli əməkdaşlığın gücləndirilməsi üzrə “2024-2026-cı illərdə Azərbaycan Respublikası ilə Rusiya Federasiyası arasında turizmin inkişafına dair Yol Xəritəsi”nin bu istiqamətdə mühüm imkanlar ehtiva etdiyini bildirib.

Fuad Nağıyev, həmçinin “Şahdağ” Turizm Mərkəzinin timsalında rusiyalı turistlərin Azərbaycandakı qış və dağ-xizək mərkəzlərinə maraq göstərməsindən bəhs edərək Rusiyanın “Roza Xutor” qış mərkəzinin də daxil olduğu Avrasiya Dağ Kurortları Alyansı çərçivəsində əməkdaşlıq imkanlarını diqqətə çatdırıb.

Rusiya Federasiyasının iqtisadi inkişaf naziri Maksim Reşetnikov pandemiyadan əvvəlki rəqəmlər tam bərpa olunmasa da, 2023-cü il statistikasına əsasən Azərbaycanın rusiyalı turistlərin üz tutduğu ölkələr sırasında birinci yerdə qərarlaşdığını, ikitərəfli turizm əlaqələrinin inkişafı üçün geniş potensialın mövcudluğunu diqqətə çatdırıb. O, həmçinin MDB ölkələrinə turlar təşkil edən Rusiya turoperatorların fəaliyyətini stimullaşdıracaq qanun layihəsi haqqında danışaraq qanun layihəsinin digər ölkələrlə yanaşı, Azərbaycanla da tərəfdaşlıq əlaqələrinin güclənməsinə təkan verəcəyini qeyd edib.

Görüşdə Rusiya ilə müntəzəm olaraq həyata keçirilən birbaşa uçuşlar, Moskvada Azərbaycanın turizm nümayəndəliyinin açılması, Xəzər dənizində kruiz turizminin inkişafı potensialı, qış turizmi üzrə əməkdaşlıq, Azərbaycanın turizm imkanlarının Rusiyada tanıdılması, investisiya imkanları, aparılan geniş marketinq və tanıtım kampaniyası, turizm sənayesi nümayəndələrinin qarşılıqlı səfərlərinin təşkili və digər məsələlər üzrə fikir mübadiləsi aparılıb.