Rusiya və Cənub-Şərqi Asiya Dövlətləri Assosiasiyasının (ASEAN) üzv ölkələri ABŞ və İran arasında əldə olunan razılaşmanı yekdilliklə dəstəkləyiblər.
“Operativ Məlumat Mərkəzi-OMM”xəbər verir ki, bunu Rusiya Prezidenti Vladimir Putin Kazanda keçirilən Rusiya-ASEAN sammitindən sonra bildirib.
Putinin sözlərinə görə, tərəflər Vaşinqton və Tehran arasında hərbi münaqişəyə son qoymaq və gələcək sülh müqaviləsinin əsaslarını hazırlamaq məqsədi daşıyan razılaşmaları müsbət qarşılayıblar.
“Biz İran və Amerika tərəfləri arasında hərbi münaqişəyə son qoymaq və gələcək sülh müqaviləsinin parametrləri üzərində işləmək üçün əldə edilən razılaşmaları yekdilliklə alqışladıq”, - deyə Rusiya lideri vurğulayıb.
O qeyd edib ki, beynəlxalq ictimaiyyətin bu istiqamətdə göstərdiyi səylər regionda sabitliyin və təhlükəsizliyin təmin olunması baxımından mühüm əhəmiyyət daşıyır.
Putin həmçinin bildirib ki, Rusiya müxtəlif ölkələrlə dialoqu və diplomatik həll yollarını dəstəkləməyə davam edir.
