UEFA "Qarabağ" klubunu 28500 avro cərimələyib.

"Operativ Məlumat Mərkəzi-OMM" xəbər verir ki, buna "köhlən atlar"ın Çempionlar Liqası matçlarında yaşananlar səbəb olub.

Ağdam təmsilçisi Bolqarıstanda “Ludoqorets”ə 7:2 hesabı ilə qalib gəldiyi III təsnifat mərhələsinin cavab matçında "komandanın düzgün olmayan davranışı"na görə 6000 avro ödəyəcək.

Azərbaycan çempionu Bakıda Xorvatiyanın "Dinamo" kollektivinə uduzduğu (0:2) pley-mərhələsinin cavab qarşılaşmasına görə daha çox ziyana düşüb. "Qarabağ" "idman tədbirinə uyğun olmayan mesajın ötürülməsi"nə görə 22500 avro cərimələnib.

UEFA "Zirə" klubuna xəbərdarlıq edib.

"Operativ Məlumat Mərkəzi-OMM"-in xəbərinə görə, buna Bakıda Xorvatiya təmsilçisi "Osiyek"ə qarşı keçirilən Konftrans Liqasının III təsnifat mərhələsinin cavab matçında yaşananlar səbəb olub.

"Qartallar" "komandanın düzgün olmayan davranışı"na görə xəbərdarlıq alıb.

Qeyd edək ki, qarşılaşmanın əsas və əlavə vaxtı 2:2 hesabı ilə yekunlaşıb. Səfərdə rəqibi ilə bərabərə qalan (1:1) "Zirə" penaltilər seriyasında (2:1) mərhələ adlayan tərəf olub. Bakı təmsilçisi növbəti raundda iki oyunun nəticəsinə əsasən Kiprin "Omoniya" komandasına uduzub - 0:6, 1:0.

"Mançester Siti"nin hücumçusu Erlin Haaland Premyer Liqada yeni rekorda imza atıb.

"Operativ Məlumat Mərkəzi-OMM" xəbər verir ki, bu barədə "Squawka" məlumat yayıb.

24 yaşlı norveçli Premyer Liqanın 5-ci turunda "Arsenal" ilə görüşdə (2:2) qol vurub. Vurduğu qol hücumçunun cari mövsüm onuncu qoludur.

Haaland Premyer Liqa tarixində ilk 5 matçda 10 qol vuran ilk oyunçu olub.

5 turdan sonra “Mançester Siti” Premyer Liqanın turnir cədvəlinə 13 xalla “Liverpul” və “Aston Villa”nı 1 xal qabaqlayır.

Joze Mourinyo "Qalatasaray"a qarşı oyundan sonra radikal addımlar atmaq qərarı verib.

"Operativ Məlumat Mərkəzi-OMM" "NTV Spor"a istinadən xəbər verir ki, portuqaliyalı mütəxəssis derbidə start heyətin ən azı 6 futbolçusunu ehtiyata göndərəcək. Mourinyo sentyabrın 26-da "Yunion"a qarşı Avropa Liqası oyununda aşağıdakı futbolçulara ilk "11-lik"də şans verəcək:

Qapıda İrfan Can Eğribayatın şansı artıb. Futbolçu uzun müddət ehtiyat heyətdə idi. 

Mourinyo orta sahədə Mert Hakan Yandaş və Sofyan Ambaratı görmək istəyir. Cengiz Ünder, Filip Kostiç və Cenk Tosuna da start heyətdə şans veriləcək.

Qeyd edək ki, "Fənərbağça" hazırda turnir cədvəlinə liderlik edən "Qalatasaray"dan 5 xal geridədir.

“Bildiyiniz kimi, mən artıq “Neftçi”nin kapitanı deyiləm. 6 il ərzində “Neftçi”nin kapitanı olmuşam və bununla qürur duyuram”.

"Operativ Məlumat Mərkəzi-OMM" xəbər verir ki, bu fikirlər “Neftçi”nin yarımmüdafiəçisi Emin Mahmudova məxsusdur.

Mahmudov kapitanlığın ondan alınmasına özünün sosial şəbəkə səhifəsində paylaşım etməklə münasibət bildirib.

E.Mahmudov daha sonra bunları qeyd edib: “Bu müddətdə çətin anlar da oldu, kədərli də, amma sevincli günlər də az deyildi. Düzdür, oyunumda eniş-yoxuşlar oldu, amma həmişə komandaya kömək etmək üçün bacardığım qədər çalışdım.

Bəzən alınmadı, amma mən əlimdən gələni etdim. Sizdən hər zaman dəstək gördüm. Buna görə də hər birinizə təşəkkür edirəm”.

Qeyd edək ki, baş məşqçi Roman Qriqorçukun qərarı ilə “Neftçi”nin yeni kapitanı Ramil Şeydayev, vitse-kapitanlar isə Yuri Matias və Robert Bauerdir.

Türkiyə Super Liqasında bu gün "Qalatasaray" komandası səfərdə "Fənərbağça" ilə üz-üzə gələcək.

 "Operativ Məlumat Mərkəzi-OMM" xəbər verir ki, ölkə çempionatının VI turunda keçiriləcək görüşü Atilla Karaoğlan idarə edəcək.

"Ülkər" stadionunda Bakı vaxtı ilə saat 21:00-da başlayacaq İstanbul derbisi komandalar arasında 135-ci olacaq. İndiyə qədər keçirilən görüşlərin 53-də "Fənərbağça", 37-də isə "Qalatasaray" qələbə qazanıb. Qalan 44 oyun heç-heçə nəticələnib. Komandaların aralarındakı son 10 matçda "Qalatasaray" 5, "Fənərbağça" 3 qələbə qazanıb. Digər iki oyun 0:0 hesablı heç-heçə ilə yekunlaşıb.

"Fənərbağça" klubu ölkə çempionatları tarixində "Qalatasaray"ı ən çox məğlub edən (53) və bu rəqibə ən çox qol vuran (163) kollektivdir.

"Qalatasaray" Okan Burukun rəhbərliyi altında "Fənərbağça"ya qarşı keçirdiyi son 4 oyunda cəmi bir dəfə məğlub olub (19 may 2024-cü il, 0:1).

Qeyd edək ki, "Qalatasaray" hazırda 15 xalla turnir cədvəlinə rəhbərlik edir. Joze Mourinyonun baş məşqçisi olduğu "Fənərbağça" isə 13 xalla ikinci pillədə qərarlaşıb.