Azərbaycan Respublikasının Prezidenti İlham Əliyev İtaliya Respublikasının Prezidenti Sercio Mattarellaya təbrik məktubu göndərib. Dövlət başçısı İtaliya Respublikasının yaranmasının 80-ci ildönümü münasibətilə həmkarını və dost İtaliya xalqını təbrik edib.
Prezident İlham Əliyev İtaliyanı Azərbaycanın yaxın dostu və etibarlı strateji tərəfdaşı kimi xarakterizə edərək, ölkələr arasındakı münasibətlərin qarşılıqlı hörmət və etimad əsasında genişləndiyini qeyd edib. Məktubda ikitərəfli əlaqələrin bütün sahələrdə, o cümlədən iqtisadi-ticari, enerji, sənaye və təhsil istiqamətlərində uğurla inkişaf etdiyi vurğulanıb.
Dövlət başçısı əməkdaşlığın inkişafında siyasi dialoqun roluna toxunaraq bildirib:
- Keçən ilin oktyabrında İtaliya Prezidentinin Azərbaycana ikinci rəsmi səfəri dövlətlərarası münasibətlərin yüksək səviyyəsinin göstəricisidir.
- Səfər çərçivəsində İtaliya-Azərbaycan Universitetinin açılışında birgə iştirak mədəni-humanitar əlaqələrə verilən önəmin təzahürüdür.
Prezident İlham Əliyev iqtisadi potensialın tam reallaşdırılması, sərmayə, müdafiə və digər sahələrdə əməkdaşlığın şaxələndirilməsinin qarşıda duran əsas vəzifələrdən olduğunu qeyd edib. Sonda dövlət başçısı İtaliya Prezidentinə cansağlığı, dost İtaliya xalqına isə firavanlıq və rifah arzulayıb.
