İran Prezidenti Məsud Pezeşkiyan ABŞ ilə münasibətlər və danışıqlar prosesi barədə açıqlama verib.
“Operativ Məlumat Mərkəzi – OMM” xəbər verir ki, Pezeşkiyan Tehranda keçirilən “Bugünün qadınları, sabahın İranı” adlı tədbirdə çıxışı zamanı İranın əsas məqsədinin müharibə deyil, ölkənin ərazi bütövlüyünü qorumaq olduğunu bildirib.
Prezidentin sözlərinə görə, Tehran ABŞ ilə dialoq qurmaqdan çəkinmir, lakin danışıqlar milli maraqlar və müəyyən prinsiplər əsasında aparılmalıdır.
Pezeşkiyan bildirib ki, İran müzakirələr prosesində “müdriklik, ləyaqət və milli maraqları” əsas götürərək addım-addım irəliləyəcək.
İran prezidentinin sözlərinə görə, ABŞ ilə danışıqların əsas məqsədləri arasında sanksiyaların aradan qaldırılması, bloklanmış maliyyə vəsaitlərinin azad edilməsi, həmçinin nüvə proqramı ilə bağlı razılaşmanın əldə olunması dayanır.
Pezeşkiyan danışıqların təslimiyyət kimi qiymətləndirilməməli olduğunu vurğulayıb. O, bu kontekstdə Çinin təcrübəsini nümunə göstərərək, ölkələrin iqtisadi rəqabət və inkişaf yolu ilə öz güclərini nümayiş etdirə biləcəyini bildirib.
İran Prezidenti əlavə edib ki, ölkənin müdafiəsi, xalqa xidmət və milli mənsubiyyət hissinin gücləndirilməsi dövlətin əsas prioritetləri olaraq qalır.
