Paraqvay Prezidenti Santyaqo Pena milli futbol komandasının Almaniya yığması üzərində qazandığı qələbənin şərəfinə 30 iyun tarixini ölkədə milli bayram elan edib.
"Operativ Məlumat Mərkəzi-OMM" xəbər verir ki, bu barədə prezident özü “X” sosial şəbəkə hesabında paylaşım edərək müvafiq fərmanın görüntülərini ictimaiyyətə təqdim edib.
Rəsmi sənəddə qeyd olunur ki, milli komandanın əldə etdiyi bu nəticə yalnız idman uğuru deyil, həm də Paraqvay üçün mühüm milli əhəmiyyət kəsb edən hadisə kimi qiymətləndirilir. Hakimiyyət bu səbəbdən qələbənin ölkə üzrə birgə qeyd olunmasını məqsədəuyğun hesab edib.
Prezident Santyaqo Pena paylaşımında milli komandaya təşəkkür edərək onların ölkəyə böyük sevinc yaşatdığını və milyonlarla paraqvaylını vahid bayraq altında birləşdirdiyini vurğulayıb.
Məlumata görə, qarşılaşma ABŞ-ın Boston şəhərində keçirilib. Gərgin keçən oyunda Paraqvay və Almaniya yığmaları əsas və əlavə vaxtda qalibi müəyyən edə bilməyib. Penaltilər seriyasında 4:3 hesabı ilə qələbə qazanan Paraqvay millisi turnirin 1/8 final mərhələsinə yüksəlib.
