Alimlər 2017-ci ildə əldə edilmiş məlumatları yenidən təhlil edərək kosmosda mühüm bir kəşfə imza atıblar.
"Operativ Məlumat Mərkəzi-OMM" "Astrophysical Journal" dərgisinə istinadən xəbər verir ki, üzərində həyat ehtimalı olan yeni bir planet müəyyən edilib.
Yer kürəsindən 146 işıq ili məsafədə yerləşən bu planet, öz ölçülərinə və quruluşuna görə diqqət çəkir.
Tədqiqatın nəticələrinə görə, yeni kəşf edilən göy cisminin xüsusiyyətləri aşağıdakılardır:
- Yer kürəsindən təxminən 6 faiz daha böyükdür;
- Qayalıq səthə malikdir;
- Günəşə bənzər bir ulduzun ətrafında dövr edir;
- Ulduz ətrafında tam bir dövrünü (bir ilini) 355 gündə tamamlayır.
Mütəxəssislər planetin "yaşanıla bilən zona" daxilində yerləşdiyini və bəzi bölgələrində maye halında suyun tapılma ehtimalının 50 faiz olduğunu bildirirlər.
Lakin orada həyatı çətinləşdirən ciddi amillər də mövcuddur. Planetin səthi "Mars" planetini xatırladır və temperaturun mənfi 70 dərəcəyə qədər düşdüyü ehtimal edilir.
Bunun əsas səbəbi, orbitində döndüyü ulduzun Günəşdən daha soyuq olması və ətrafa üç dəfə daha az istilik yaymasıdır.
Hazırkı texnoloji imkanlarla bu planetə çatmaq qeyri-mümkün hesab olunur, çünki 146 işıq ili məsafəni qət etmək minlərlə il vaxt tələb edir. Həmçinin, tapıntının rəsmən planet statusu alması üçün onun öz ulduzu ətrafında ən azı üç tam dövrü müşahidə edilməlidir. Hazırda isə elm adamları tərəfindən yalnız bir dövr qeydə alınıb.
