Çin tərəfindən hazırlanmış yeni süni intellekt tətbiqi "Hollywood" kino sənayesində ciddi narahatlıq doğurub.
"Operativ Məlumat Mərkəzi-OMM" xarici KİV-ə istinadən xəbər verir ki, 2025-ci ilin iyununda səssizcə istifadəyə verilən modelin səkkiz ay sonra təqdim edilən ikinci versiyası, cəmi bir neçə yazılı komanda vasitəsilə kino keyfiyyətində video, səs effektləri və dialoqlar yarada bilir.
Sahə mütəxəssisləri qeyd edirlər ki, "Seedance" rəqiblərindən fərqli olaraq, sanki peşəkar çəkiliş prosesindən çıxmış nəticələr təqdim edir.
Mətn, təsvir və səsi vahid sistemdə birləşdirən modelin uğuru, keçmişdə viral olan aşağı keyfiyyətli süni intellekt videolarını geridə qoyaraq böyük büdcəli döyüş filmlərini xatırladır.
Sinqapur mərkəzli "Tiny Island Productions"ın rəhbəri David Kvok bildirib ki, sistemin mürəkkəb döyüş səhnələrindəki reallığı sanki peşəkar bir görüntü rejissorunun işini əvəz edir.
Lakin "Seedance" tətbiqinin sürətli yüksəlişi ciddi hüquqi problemləri də bərabərində gətirib. "Spider-Man" və "Darth Vader" kimi müəllif hüquqları ilə qorunan personajların videolarda istifadə edilməsi səbəbindən "Disney" və "Paramount" kimi nəhəng studiyalar "ByteDance" şirkətinə xəbərdarlıq göndərib.
Eyni zamanda, Yaponiya da populyar anime personajlarının icazəsiz istifadəsi ilə bağlı firmaya qarşı araşdırmalara başlayıb.
Mütəxəssislər süni intellekt şirkətlərinin məlumat sahiblərinə ödəniş etməkdən yayındığını və texnologiyanı insan əməyindən üstün tutduğunu vurğulayırlar.
Xatırladaq ki, "Disney" şirkəti "Star Wars" və "Marvel" personajlarını istifadə edə bilmək üçün "OpenAI"ın "Sora" modeli ilə 1 milyard dollarlıq müqavilə imzalayıb.
Analitiklərin fikrincə, "Seedance 2.0" Çinin süni intellekt yarışında Qərb rəqiblərini ötməyə başladığının göstəricisidir. Keçən il "DeepSeek" modelinin yaratdığı təsirdən sonra gələn bu addım, Pekinin süni intellekt və robototexnikanı iqtisadi strategiyasının mərkəzinə qoymaq planı ilə üst-üstə düşür. 2026-cı ilin Çində süni intellektin kütləvi mənimsənilməsi üçün dönüş nöqtəsi olacağı və bu texnologiyanın aşağı büdcəli serialları daha iddialı janrlara daşıyacağı gözlənilir.
