"Gemini" süni intellekti artıq mahnı bəstələyə biləcək

"Google" şirkəti "Gemini" süni intellekt çatbotu üçün yeni musiqi yaratma funksiyasını istifadəyə verib.

"Operativ Məlumat Mərkəzi-OMM" xəbər verir ki, artıq istifadəçilər müəyyən bir əhval-ruhiyyə, janr və ya mövzu daxil etməklə 30 saniyəlik tam musiqi parçaları bəstələyə biləcəklər.

Sistem təkcə musiqini deyil, həm də mahnı sözlərini və "Nano Banana" modeli vasitəsilə vizual üz qabıqlarını avtomatik hazırlayır.

Bu yenilikdən 18 yaşdan yuxarı şəxslər yararlana bilər. "Google AI Plus", "Pro" və "Ultra" abunəçiləri üçün isə daha geniş istifadə limitləri nəzərdə tutulub.

Layihənin əsas məqsədi kommersiya hitləri yaratmaqdan ziyadə, musiqi təcrübələri aparmaq və əyləncəli məzmunlar paylaşmaqdır.

Yaradılan hər bir parçaya süni intellekt tərəfindən hazırlandığını bildirən və insan qulağının duya bilməyəcəyi rəqəmsal su nişanı əlavə edilir.

Sistem mövcud əsərləri kopyalamır, yalnız ümumi üslubdan ilhamlanaraq tamamilə yeni materiallar istehsal edir.

Çıxışların mövcud əsərləri pozmamasını təmin etmək üçün xüsusi məzmun filtrləri tətbiq olunur.

Qeyd edək ki, "Gemini"nin bu funksiyası ingilis, alman, fransız, yapon və koreya daxil olmaqla bir neçə dili dəstəkləyir.