Asiya-Sakit okean regionunda hərbi gərginlik artmaqda davam edir. Şimali Koreya ABŞ və Yaponiyanın keçirdiyi birgə hərbi təlimləri kəskin şəkildə tənqid edib.
“Operativ Məlumat Mərkəzi-OMM” xəbər verir ki, bu barədə Şimali Koreyanın dövlət xəbər agentliyi KCNA məlumat yayıb.
Bildirilib ki, Pxenyan rəsmi Tokionu qlobal qeyri-sabitlikdən istifadə edərək “müharibə dövlətinə çevrilməyə” cəhd göstərməkdə ittiham edib.
Məlumata görə, Şimali Koreya rəsmiləri Yaponiyanın ABŞ ilə hərbi əməkdaşlığını genişləndirməklə özünün “işğalçılıq qabiliyyətini” artırdığını iddia ediblər. Rəsmi bəyanatda qeyd olunub ki, Tokionun bu addımları regional sabitlik üçün ciddi təhlükə yaradır və “ehtiyatsız” hərbi fəaliyyətlərin davam edəcəyi təqdirdə Yaponiyanın “faciəvi sonla” üzləşə biləcəyi barədə xəbərdarlıq edilib.
Bildirilib ki, tənqidlərin əsas səbəbi Yaponiyanın Quru Özünümüdafiə Qüvvələri ilə ABŞ Dəniz Piyadaları Korpusunun iştirakı ilə keçirilən “Resolute Dragon” birgə hərbi təlimləridir. İyunun 20-də Okinava və Kyuşu adalarında başlayan təlimlərin çərşənbə axşamı başa çatacağı qeyd olunub.
Bununla yanaşı, Şimali Koreya regionda keçirilən çoxmillətli təlimlər zamanı potensial zərbələrin qarşısını almaq məqsədilə “qabaqlayıcı” xarakterli uzaqmənzilli raket sınaqları keçirdiyini iddia edib.
Cənubi Koreya rəsmiləri isə Şimali Koreyanın raket fəaliyyətləri ilə bağlı ABŞ ilə sıx koordinasiyada olduqlarını açıqlayıblar. Müdafiə qurumunun sözçüsü bildirib ki, hər iki ölkə Şimali Koreya tərəfindən buraxılan çoxsaylı raketləri real vaxt rejimində izləyib və bütün ehtimallara qarşı koordinasiyanı qoruyub saxlayıb. Həmçinin sınaqdan keçirilən silahların taktiki silah sistemləri kimi qiymətləndirildiyi və hazırda təhlil edildiyi vurğulanıb.
