İsrailin Baş naziri Benyamin Netanyahu "X" sosial şəbəkəsindəki rəsmi hesabında İrana qarşı hərbi əməliyyatların intensivləşdiriləcəyini bildirib.
"Operativ Məlumat Mərkəzi-OMM" xəbər verir ki, hökumət başçısı Müdafiə naziri, Baş Qərargah rəisi və "Mossad" rəhbəri ilə görüşdüyünü, hərbi kampaniyanın davam etdirilməsi ilə bağlı xüsusi tapşırıqlar verdiyini qeyd edib.
Netanyahu bəyanatında İsrail qüvvələrinin hazırda Tehranın mərkəzinə artan güclə zərbələr endirdiyini vurğulayıb:
"Dünən biz onlarla rəhbər şəxsi zərərsizləşdirdik. Qüvvələrimiz hazırda İran paytaxtının mərkəzinə sarsıdıcı zərbələr endirir və yaxın günlərdə bu təzyiq daha da artacaq".
Məlumata görə, İsrail və ABŞ tərəfindən həyata keçirilən əməliyyatın birinci mərhələsinin əsas hədəfi İranın ali siyasi və hərbi rəhbərliyinin sıradan çıxarılması olub.
İddia edilir ki, endirilən zərbələr nəticəsində ölkənin bir sıra yüksək rütbəli rəsmiləri, o cümlədən SEPAH rəhbərliyi və Müdafiə naziri həlak olub.
