Azərbaycan Prezidenti Administrasiyasının rəhbəri Samir Nuriyev dövlət başçısının tapşırığına əsasən, Xalq şairi Nəriman Həsənzadəni evində ziyarət edib və ona ali dövlət mükafatı olan "Heydər Əliyev" ordenini təqdim edib.
"Operativ Məlumat Mərkəzi-OMM" xəbər verir ki, Samir Nuriyev şairin 95 illik yubileyi münasibətilə Prezident İlham Əliyevin və birinci xanım Mehriban Əliyevanın salamlarını, eləcə də səmimi təbriklərini çatdırıb.
Görüş zamanı Nəriman Həsənzadənin Azərbaycan ədəbiyyatına verdiyi töhfələr və milli-mənəvi dəyərlərin təbliği istiqamətindəki xidmətləri xüsusi vurğulanıb. Bildirilib ki, onun çoxşaxəli yaradıcılığı mədəniyyətin zənginləşməsinə xidmət etməklə yanaşı, gənc nəslin vətənpərvərlik ruhunda formalaşmasında mühüm rol oynayır.
Xalq şairi göstərilən yüksək diqqətə görə Prezident İlham Əliyevə və birinci xanım Mehriban Əliyevaya dərin minnətdarlığını ifadə edib. O, mədəni irsimizin qorunmasına və incəsənət xadimlərinə göstərilən dövlət dəstəyini yüksək qiymətləndirib.
Qeyd edək ki, Prezident İlham Əliyevin 18 fevral tarixli sərəncamı ilə Azərbaycanın Xalq şairi Nəriman Həsənzadə mədəniyyətin inkişafındakı xidmətlərinə görə "Heydər Əliyev" ordeni ilə təltif edilib.
