Gürcüstan Ermənistanla Azərbaycan arasında sülh sazişinin imzalanması prosesinin inkişafında maraqlıdır və etibarlı qonşularına danışıqlar üçün öz platformasını təklif edir.
"Operativ Məlumat Mərkəzi-OMM" xəbər verir ki, bu barədə Gürcüstan xarici işlər nazirinin müavini Laşa Darsaliya Antalyada keçirilən Diplomatik Forumda bildirib.
Onun sözlərinə görə, Tiflis üçün regionda sülh vacibdir və gürcü tərəfi İrəvan və Bakının hər iki tərəfin xeyrinə olacaq razılığa gələcəyinə ümid edir.
Darsaliya qeyd edib ki, Gürcüstan Ermənistan və Azərbaycan arasında ikitərəfli danışıqlarda mövcud olan bəzi çətinlikləri görür, başa düşür və nəzərə alır. Bu məqsədlə Tiflis əvvəllər dinc mehriban qonşuluq təşəbbüsü irəli sürmüş və danışıqların aparılmasında hər iki ölkəyə dəstək təklif etmişdi.
“Bizə aydındır ki, bizim arenamıza kənar oyunçuların daxil olmasına imkan verməkdənsə, əməkdaşlığı davam etdirməliyik (Cənubi Qafqazın üç ölkəsini nəzərdə tuturuq)”, - deyə Darsaliya bildirib.
O vurğulayıb ki, regionda sülhə alternativ yoxdur, ona görə də Tiflis danışıqları və Cənubi Qafqazda sabitliyin bərqərar olmasını dəstəkləyir.
Gürcüstan xarici işlər nazirinin müavini həmçinin xatırladıb ki, Tiflis Ankara və Bakı ilə ənənəvi strateji əlaqələrin inkişafında maraqlıdır.