Afət Ziyadqızı
İyulun 7-8-də Ankarada keçirilən 36-cı NATO Dövlət və Hökumət Başçıları Zirvəsi paytaxtın turizm və xidmət sektoruna böyük iqtisadi töhfə verib.
“Operativ Məlumat Mərkəzi-OMM” xəbər verir ki, Ankara İl Mədəniyyət və Turizm Müdiri Erhan Karakaya zirvənin şəhər üçün mühüm əhəmiyyət daşıdığını bildirib. Onun sözlərinə görə, Ankara bu miqyasda beynəlxalq tədbirləri qəbul etmək üçün kifayət qədər geniş yerləşdirmə imkanlarına malikdir.
Məlumata əsasən, zirvə zamanı 23 oteldə təxminən 5 min 500 qonaq yerləşdirilib. Ümumilikdə isə paytaxta gələn xarici qonaqların sayı 7 minə yaxın olub.
Rəsmi məlumatlara görə, yalnız otel sektorunun gəliri 600 milyon lirə təşkil edib. İctimai iaşə, kiçik ticarət obyektləri və digər xidmət sahələri də nəzərə alındıqda, iyulun 1-8-i tarixləri arasında Ankaranın əldə etdiyi ümumi iqtisadi gəlir 800-900 milyon lirəyə çatıb. Bu göstərici ötən ilin eyni dövrü ilə müqayisədə təxminən 6 dəfə çoxdur.
Erhan Karakaya qeyd edib ki, bu cür beynəlxalq tədbirlər yalnız qısamüddətli iqtisadi fayda yaratmır, eyni zamanda Ankaranın qlobal miqyasda tanıdılmasına və yeni turizm investisiyalarının cəlb olunmasına imkan verir.
Qeyd edək ki, Ankara qarşıdakı beynəlxalq tədbirlərə də hazırlaşır. Oktyabr ayında keçiriləcək 13-cü Türk Dövlətləri Təşkilatı Dövlət Başçıları Zirvəsi üçün hazırlıq işləri artıq başlayıb.
