Hindistanın şərq sahillərində keçiriləcək Beynəlxalq Donanma İcmalı (IFR) və “Milan 2026” təlimlərində 72 ölkənin donanmasının nümayəndələri iştirak edəcək.
“Operativ Məlumat Mərkəzi-OMM” xəbər verir ki, bu barədə Hindistan Hərbi Dəniz Qüvvələri məlumat yayıb.
Bildirilib ki, ABŞ və Rusiya da daxil olmaqla 72 ölkənin qatılacağı hazırkı IFR və MILAN təlimləri daha geniş miqyaslı və dərin əhəmiyyətə malik olacaq. Qeyd olunub ki, meqa birgə dəniz tədbirlərində üç ölkədən 60-dan çox hərbi gəmi və dəniz aviasiyası vasitəsi iştirak edəcək.
Manevrlərdə Rusiyanı Rusiya Sakit Okean Donanmasının freqatı “Marşal Şapoşnikov” təmsil edəcək. Təlimə ilk dəfə olaraq Almaniya, Filippin və BƏƏ-dən hərbi gəmilər də qoşulacaq. O cümlədən Filippin Hərbi Dəniz Qüvvələrinə məxsus “BRP Miguel Malvar” freqatı və BƏƏ Hərbi Dəniz Qüvvələrinə məxsus “Əl Emarat” hərbi gəmisi də manevrlərdə iştirak edəcək.
Qeyd edilib ki, “Milan 2026” təlimi dünyanın müxtəlif ölkələrindən olan dəniz qüvvələrini Vişakhapatnam şəhərində bir araya gətirir. Təlim çərçivəsində iştirakçı ölkələr arasında dostluq və əməkdaşlıq əlaqələrinin möhkəmləndirilməsi, təcrübə mübadiləsi və dəniz təhlükəsizliyi sahəsində əməkdaşlığın genişləndirilməsi nəzərdə tutulur.
