OMM Redaksiyası
Azərbaycan millisinin hücumçusu Mahir Emreli Litva ilə qarşılaşmada qazanılan 1:0 hesablı qələbəni dəyərləndirib. O, oyunun gözlənildiyi kimi çətin keçdiyini bildirib.
“Birəbir mübarizələrdə hiss olunurdu”
Emrelinin sözlərinə görə, komanda görüşə yaxşı köklənib və futbolçular meydanda bir-biri üçün mübarizə aparıblar. Hücumçu belə matçlarda fərdi mübarizələrin çoxunda qalib gəlməyin nəticəyə təsir etdiyini deyib.
O qeyd edib ki, Azərbaycan millisi Litva ilə oyunda daha çox qol vura bilərdi. Emreli bəzi futbolçuların klublarında az oyun keçirməsinin fürsətləri dəyərləndirməyə təsir göstərə biləcəyini söyləyib. Onun fikrincə, oyun praktikası artdıqca futbolçular belə epizodlarda daha rahat qərar verirlər.
“Bəlkə də qrupun ən önəmli qələbəsi idi”
Hücumçu Lixtenşteynlə qarşılaşmanın nəticəsindən sonra Litva üzərində qələbənin komanda üçün vacib olduğunu vurğulayıb. Emreli bu qələbənin futbolçulara mental baxımdan müsbət təsir etdiyini və komandanı yenidən mübarizəyə qaytardığını bildirib.
“Bu, çox önəmli qələbə idi. Bəlkə də qrupun ən önəmli qələbəsi idi”, – deyə Emreli qeyd edib.
O, qarşıda daha bir oyunun qaldığını xatırladaraq həm qələbədən sonra həddindən artıq sevinməməyin, həm də uğursuz nəticəyə görə ruhdan düşməməyin vacib olduğunu söyləyib. Emreli komandanın sakit qalacağı təqdirdə nəticə qazanacağına ümid etdiyini bildirib.
