Qırğızıstan altıncı dəfə keçirilən “World Nomad Games” – Ümumdünya Köçəri Oyunlarına ev sahibliyi edir.
“Operativ Məlumat Mərkəzi – OMM” xəbər verir ki, avqustun 31-dən sentyabrın 6-dək davam edəcək tədbirdə köçəri xalqların mədəni irsi, ənənəvi idman növləri və tarixi qlobal platformada nümayiş etdirilir.
2014-cü ildə ilk dəfə keçirilən Ümumdünya Köçəri Oyunları bu il yenidən öz vətəninə – Qırğızıstana qayıdıb.
“Köçəri dünyasının Olimpiadası” kimi xarakterizə olunan tədbir yalnız idman yarışlarından ibarət deyil. Proqrama ənənəvi idman növləri ilə yanaşı, mədəni sərgilər, elmi müzakirələr, musiqi və sənətkarlıq nümunələri də daxildir.
Oyunların əsas məqsədi modernləşmə nəticəsində yox olmaq təhlükəsi ilə üzləşən qədim adət-ənənələri və köçəri həyat tərzinə xas bacarıqları gələcək nəsillərə ötürməkdir.
Budəfəki yarışlarda 112 ölkədən 3 minə yaxın iştirakçının qatıldığı bildirilir. Proqrama atüstü oyunlar, güləş, oxatma, ovçuluq ənənələri, güc yarışları və intellektual oyunlar daxil olmaqla 42 idman növü daxildir.
Tədbirin rəsmi açılış mərasimi yeni istifadəyə verilən “Bishkek Arena” stadionunda baş tutub.
Yarışların əsas hissəsi isə İssık-Kul gölü ətrafında, o cümlədən Çolpon-Ata şəhərində və Kırçın dərəsində təşkil olunur.
İştirakçılar arasında Azərbaycan nümayəndə heyəti də yer alır. Ölkəmiz tədbirin idman, mədəni və elmi proqramlarında təmsil olunur.
Yarışlarda kok-boru, er eniş, salbuurun və “Toguz korgool” kimi ənənəvi idman və intellektual oyunlara xüsusi yer verilib.
Qeyd edək ki, 2026-cı il Ümumdünya Köçəri Oyunları Qırğızıstanda keçirilən Şanxay Əməkdaşlıq Təşkilatının (ŞƏT) sammiti ilə eyni vaxta təsadüf edir. Bu isə ölkənin həm diplomatik, həm də mədəni mübadilə mərkəzi kimi beynəlxalq diqqət mərkəzinə çıxmasına səbəb olub.
