Şəxs adları Komissiyasının ilk iclasında nələr müzakirə olundu?
Azərbaycan Milli Elmlər Akademiyasının (AMEA) Nəsimi adına Dilçilik İnstitutunda, Azərbaycan Respublikası Terminologiya Komissiyasının nəzdində fəaliyyət göstərən Şəxs adları Komissiyasının ilk iclası keçirilib.
“Operativ Məlumat Mərkəzi-OMM” xəbər verir ki, iclasda komissiyanın yeni tərkibi iştirak edərək, adların elmi əsaslarla sistemləşdirilməsi məsələlərini diqqət mərkəzinə gətirib.
Nəsimi adına Dilçilik İnstitutunun direktoru, Şəxs adları Komissiyasının sədri professor Nadir Məmmədli bildirib ki, komissiyanın gələcək fəaliyyəti nəticəsində şəxs adlarının elmi əsaslarla sistemləşdirilməsi və onların düzgün yazılış normalarının müəyyənləşdirilməsi istiqamətində mühüm addımlar atılacaq.
Bununla yanaşı, Azərbaycan dilinin daxili qanunauyğunluqlarına uyğun olmayan təsadüfi və süni adların qarşısının alınması planlaşdırılır. Qeyd edilib ki, milli ad fondunun qorunması və zənginləşdirilməsi, unudulmuş və tarixi ənənəyə malik adların yenidən dövriyyəyə qaytarılması da Komissiyanın əsas fəaliyyət istiqamətlərindən biri olacaqdır.
Qadağan olunan adlar və yeni adların yaradılması prinsipləri
İclasda Şəxs adları Komissiyasının gördüyü işlərin planı açıqlanıb. Komissiyanın məqsədi və funksiyası, Azərbaycan şəxs adlarının təsnifatı, yazılış və transliterasiya problemi kimi aktual mövzular müzakirə olunub.
Həmçinin, qadağan və ya arzuolunmaz adlar, yeni adların yaradılması prinsipləri, normativ lüğət və açıq platforma yaradılması və sair məsələlər ətrafında fikir mübadiləsi aparılıb.
Adların orfoqrafiyası və "bəy", "xan" titullarının işlənməsi qaydaları
Ədliyyə Nazirliyinin Qeydiyyat şöbəsinin rəisi Rəşidə Mənafova çıxışında titul bildirən "bəy", "xan" sözlərinin şəxs adlarının tərkibində işlənməsi məsələsinə xüsusi diqqət ayırıb. O, bu gün vətəndaşlar arasında adların orfoqrafiyası və səslənməsi məsələsini gündəmə gətirib.
Komissiya üzvləri, ölkədə geniş yayılmış bəzi adların mənşəyinə və onların dil normalarına uyğunluğuna dair fikirlərini bölüşüblər. İclasda yeni təklif olunan adların Azərbaycan dilinin orfoqrafiya normalarına uyğunluq məsələsi xüsusi diqqət mərkəzində olub.
Yeni formalaşdırılmış Komissiyanın fəaliyyət istiqamətləri, qarşıya qoyulan strateji vəzifələr və bu istiqamətdə həyata keçirilməsi nəzərdə tutulan tədbirlər barədə ictimaiyyətə mütəmadi məlumat veriləcək.
