Afət Ziyadqızı
İspaniyanın cənubunda yerləşən Qranada şəhərində ardıcıl yeraltı təkanlar ciddi narahatlığa səbəb olub.
“Operativ Məlumat Mərkəzi – OMM” xəbər verir ki, Milli Coğrafiya İnstitutunun (IGN) məlumatına görə, çərşənbə axşamı bölgədə bir neçə zəlzələ qeydə alınıb və onların hər birinin maqnitudası 4,0-dən yuxarı olub.
Endülüs bölgəsinin fövqəladə hallar üzrə rəsmisi Antonio Sanzın sözlərinə görə, zəlzələlər nəticəsində azı üç nəfər yüngül xəsarət alıb. Onlardan bir uşağın xəstəxanaya yerləşdirildiyi bildirilir.
Bölgədə narahatlıq şənbə günü baş verən 5,0 maqnitudalı zəlzələdən sonra daha da artıb. İlkin yoxlamalar zamanı tarixi tikililərdə ciddi dağıntı qeydə alınmasa da, ardıcıl təkanlar səbəbindən təhlükəsizlik tədbirləri gücləndirilib.
İslam memarlığının mühüm nümunələrindən olan və UNESCO-nun Dünya İrs Siyahısına daxil edilən “El Hamra Sarayı” kompleksinin bəzi hissələrinə turistlərin girişi müvəqqəti olaraq dayandırılıb.
Qranada vilayət rəhbərliyinin məlumatına görə, inzibati binaların, muzeylərin və idman qurğularının fəaliyyəti də müvəqqəti dayandırılıb. İlkin tibbi yardım mərkəzlərinin isə fəaliyyətini davam etdirdiyi bildirilir.
Nəqliyyat sistemində də təhlükəsizlik tədbirləri görülüb. Şəhər metrosunda qatarların hərəkət sürəti saatda 30 kilometrə endirilib. Bəzi otellərdə isə ehtiyat tədbiri olaraq insanların təxliyəsi həyata keçirilib.
Zəlzələlərin episentrlərindən biri Qranada şəhər mərkəzindən təxminən 10 kilometr cənubda yerləşən Qojar qəsəbəsi olub.
Saat 10:37-də qeydə alınan 4,7 maqnitudalı zəlzələnin yerin dayaz qatında baş verməsi səbəbindən ətraf yaşayış məntəqələrində daha güclü hiss edildiyi bildirilir. Əsas təkanın ardından bölgədə qısa fasilələrlə daha iki zəlzələ qeydə alınıb.
Rəsmilər ərazidə vəziyyəti izləməkdə davam edir və mümkün yeni təkanlarla bağlı təhlükəsizlik tədbirlərinin qüvvədə saxlanıldığını bildirirlər.
