"İran vəziyyət sabitləşdikdən sonra Rusiya ilə birgə infrastruktur layihələrinin icrasını sürətləndirmək niyyətindədir".
“Operativ Məlumat Mərkəzi-OMM” xəbər verir ki, bu sözləri İranın Rusiyadakı səfiri Kazem Cəlali deyib.
“Hazırkı vəziyyətdə iki ölkə arasında əlaqələr davam edir və məqsədimiz birgə layihələri dayandırmamaq, vəziyyət sabitləşdikdən sonra isə onların icrasını sürətləndirməkdir. Məsələn, Buşehr Atom Elektrik Stansiyasında işlər davam edir”, - səfir bildirib.
Cəlalinin sözlərinə görə, hazırda İran və Rusiya bir sıra infrastruktur və iqtisadi layihələr üzrə danışıqlar aparır və onların həyata keçirilməsi istiqamətində praktiki addımlar atırlar.
Səfir ən mühüm layihələrdən birinin Şimal-Cənub Beynəlxalq Nəqliyyat Dəhlizi çərçivəsində Rəşt-Astara dəmir yolu xəttinin tikintisi olduğunu qeyd edib.
Onun sözlərinə görə, tərəflər layihənin icrasına dair müqavilə ilə bağlı razılığa gəlib və sənədin imzalanması planlaşdırılır.
Cəlali həmçinin enerji əməkdaşlığının inkişafı ilə bağlı danışıqlar aparıldığını bildirib.
Qeyd olunub ki, bu çərçivədə Rusiyadan İrana təbii qazın nəql olunması və bunun üçün zəruri infrastrukturun yaradılması məsələləri müzakirə edilir.
