Türkiyə Böyük Millət Məclisinin (TBMM) keçmiş sədri, Türkiyə siyasətinin önəmli simalarından olan Hüsaməddin Cindoruk 93 yaşında vəfat edib.
“Operativ Məlumat Mərkəzi-OMM” "Haber Global"a istinadən xəbər verir ki, siyasətçi müalicə aldığı xəstəxanada həyatını itirib.
Xatırladaq ki, H.Cindoruk 1933-cü ildə İzmirdə anadan olub. Ankara Universitetinin Hüquq fakültəsini bitirib, hüquqşünas kimi fəaliyyət göstərib. O, siyasi karyerasına 1960-cı il dövlət çevrilişindən sonra qapadılan Demokrat Partiyasında başlayıb. Bundan sonra Doğru Yol Partiyasının (DYP) qurucularından olub və uzun illər onun sədri kimi fəaliyyət göstərib.
1991-ci il parlament seçkilərindən sonra Türkiyə Böyük Millət Məclisinin sədri (1991-1995) olub. Süleyman Dəmirəl prezident seçildikdən sonra bir müddət DYP sədri vəzifəsini icra edib. Eyni zamanda sağ mərkəzçilərin önəmli simalarından biri kimi tanınan H.Cindoruk qısa müddətdə prezident səlahiyyətlərini də həyata keçirib.
