OMM Redaksiyası
Azərbaycanda hərbçilərin sosial rifahının yaxşılaşdırılması məqsədilə vəzifə və rütbəyə görə verilən ödənişlərin artırılması təklif edilir.
“Operativ Məlumat Mərkəzi-OMM” xəbər verir ki, bu mühüm məsələ İnsan hüquqları üzrə müvəkkilin (ombudsmanın) 2025-ci il üzrə məruzəsində öz əksini tapıb və Milli Məclisin İnsan hüquqları komitəsinin iclasında müzakirəyə çıxarılıb.
Hərbçilərin maaşı və kirayə pulları artırılacaqmı?
Ombudsmanın irəli sürdüyü təklifə əsasən, hərbi qulluqçulara (müddətli həqiqi hərbi qulluqçular istisna olmaqla) həm tutduqları vəzifəyə, həm də hərbi rütbələrə görə ödənilən pul təminatının məbləği artırılmalıdır.
Bundan əlavə, sənəddə real bazar vəziyyəti və mənzil kirayəsindəki qiymət artımı xüsusi qeyd olunub. Bu səbəbdən, hərbi qulluqçulara müvəqqəti mənzil kirayəsi üçün müəyyən edilmiş pul kompensasiyasının məbləğinin də artırılması zəruri hesab edilir.
Müharibə iştirakçılarının statusu və uşaq pulları
Məruzədə vurğulanıb ki, Birinci Qarabağ müharibəsindən Vətən müharibəsinədək olan dövrdə Azərbaycanın ərazi bütövlüyü uğrunda gedən döyüşlərdə iştirak etmiş şəxslərin statusuna aydınlıq gətirilməsi vacibdir. Bura aşağıdakı hərbi əməliyyatlar daxildir:
- 2016-cı ilin aprel döyüşləri;
- 2020-ci ilin iyulunda Tovuz döyüşləri;
- 2023-cü il antiterror əməliyyatı və digər hərbi toqquşmalar.
Həmçinin, şəxs müddətli həqiqi hərbi xidmətdə olduğu müddətdə onun uşaqlarına ödənilən müavinətin məbləğinin ölkə üzrə uşaqlar üçün müəyyən edilmiş yaşayış minimumuna uyğunlaşdırılması təklif olunur.
Qiyabi təhsil alanlara hərbi möhlət təklifi
Bununla bərabər, Ombudsman təhsil sahəsində də dəyişiklik təklif edir. "Hərbi vəzifə və hərbi xidmət haqqında" qanunun 21-ci maddəsində (Təhsili davam etdirmək üçün çağırışa möhlət verilməsi) müvafiq dəyişikliyin edilməsi gündəmə gətirilib.
Təklifə görə, qiyabi təhsilalma formasında təhsil alan şəxslərə münasibətdə də hərbi çağırışa möhlət verilməsi nəzərdə tutulur.
