BMT-nin Baş katibi Antonio Quterreş İsrail və Livan arasında əldə olunan on günlük atəşkəsi müsbət qiymətləndirib.
“Operativ Məlumat Mərkəzi-OMM”xəbər verir ki, bu barədə xarici KİV məlumat yayıb.
Bildirilib ki, Quterreş X sosial media platformasında paylaşım edərək ABŞ-yə göstərdiyi dəstəyə görə təşəkkürünü ifadə edib.
O qeyd edib: “Ümid edirəm ki, bu, münaqişənin uzunmüddətli həlli üzrə danışıqlara yol açacaq və regionda davamlı və hərtərəfli sülhə nail olmaq üçün gələcək səylərə töhfə verəcək.”
Baş katib həmçinin bütün tərəfləri atəşkəsə riayət etməyə və hər zaman beynəlxalq hüquqa hörmət göstərməyə çağırıb.
Qeyd edək ki, İsrail və Livan arasında on günlük atəşkəs gecə yarısından qüvvəyə minib. ABŞ prezidenti Donald Tramp bu razılaşmanın əldə olunduğunu açıqlayıb.
Məlumata görə, İsrail son bir ay yarım ərzində İranın dəstəklədiyi "Hizbullah" hərəkatına qarşı əməliyyatlar çərçivəsində Livana hücumlar həyata keçirib. Bu hücumlar nəticəsində təxminən 2200 nəfərin həlak olduğu bildirilir.
Eyni zamanda, İsrailin Livanın cənubunda quru əməliyyatlarına başladığı qeyd olunur. “Associated Press”in məlumatına görə, ölkənin Baş naziri Binyamin Netanyahu atəşkəs müddətində də işğalın davam edəcəyini bildirib.
Hizbullah isə İsrailin işğalının davam etməsinin Livana müqavimət göstərmək hüququ verdiyini bəyan edib.
