Türkiyə hava məkanının pozulması ilə bağlı yaranan vəziyyət fonunda Türkiyənin xarici işlər naziri Hakan Fidan iranlı həmkarı Abbas Əraqçi ilə telefon danışığı aparıb.
“Operativ Məlumat Mərkəzi-OMM” xəbər verir ki, bu barədə "Haber Global" nazirlikdəki mənbələrinə istinadən məlumat yayıb.
Telefon danışığı zamanı Hakan Fidan Türkiyə hava məkanının pozulmasının qəbuledilməz olduğunu bildirib. O vurğulayıb ki, Türkiyə buna qarşı bütün zəruri tədbirləri görməyə davam edəcək və bütün tərəflər regional təhlükəsizliyə zərər verəcək, mülki şəxslər üçün risk yaradacaq addımlardan çəkinməlidir.
Abbas Əraqçi isə Türkiyə hava məkanına yönələn raketlərin İran mənbəli olmadığını bildirib və məsələ ilə bağlı genişmiqyaslı araşdırma aparılacağını qeyd edib.
