Azərbaycan Qarabağ və Şərqi Zəngəzur iqtisadi rayonlarında bərpa və quruculuq işlərini kənar dəstək olmadan, tamamilə öz daxili resursları hesabına icra edir. Bu barədə Ağdam, Füzuli və Xocavənd rayonlarında Azərbaycan Prezidentinin xüsusi nümayəndəsi Emin Hüseynov Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində jurnalistlərə açıqlamasında bildirib.
Emin Hüseynov qeyd edib ki, işğaldan azad olunan ərazilərdə aparılan genişmiqyaslı layihələrin maliyyələşdirilməsi üçün indiyədək dövlət büdcəsindən 25 milyard manatdan artıq vəsait ayrılıb. Xüsusi nümayəndə vurğulayıb ki, ölkəmiz bu prosesi heç bir beynəlxalq təşkilatın maliyyə yardımı olmadan, yalnız öz gücünə həyata keçirir.
