ABŞ Prezidenti Donald Tramp Azərbaycan Prezidenti İlham Əliyevə "Bakı Enerji Həftəsi"nin başlanması münasibətilə təbrik məktubu ünvanlayıb. "Operativ Məlumat Mərkəzi-OMM"-in məlumatına görə, məktubda enerji sahəsindəki əməkdaşlıqla yanaşı, regional sülh prosesinə də toxunulub.
Tramp Azərbaycanın enerji təhlükəsizliyi sahəsindəki liderliyini yüksək qiymətləndirərək, iki ölkənin karbohidrogen sektorundakı tarixi tərəfdaşlığının əhəmiyyətini vurğulayıb: "Birləşmiş Ştatlar Azərbaycanın neft-qaz sənayesinin çox böyük tərəfdarıdır və mən qətiyyətlə inanıram ki, qlobal enerji təhlükəsizliyi sahəsində əsaslı tərəfdaşlığımızın əhəmiyyəti gələcək illərdə yalnız artacaqdır".
Məktubda Ermənistanla Azərbaycan arasında sülhün təmin edilməsi istiqamətində atılan addımlara diqqət çəkilib. ABŞ Prezidenti qeyd edib ki, regional enerji inteqrasiyası avqustun 8-də keçirilmiş sülh sammitinin əsas sütunlarından biridir. Tramp administrasiyasının iyun ayında tərəflər arasında məhsuldar müzakirələrin aparılmasını gözlədiyini bildirən ABŞ lideri, birgə səylərin sülhə və rifaha töhfə verəcəyinə inamını ifadə edib.
