Milli Məclisin iclasında çıxış edən deputat Elman Məmmədov Ağdam rayonunun işğal altında olmamış dörd kəndinin əhalisinin su təminatı ilə bağlı müraciətini hökumətin diqqətinə çatdırıb.
"Operativ Məlumat Mərkəzi-OMM"-in xəbərinə görə, deputat bildirib ki, həmin ərazidə Qarabağ kanalı üzərində nasos stansiyası və su anbarının inşası kənd təsərrüfatının inkişafı və əhalinin su problemi baxımından böyük əhəmiyyət daşıyır:
“Yağış və sel sularının toplanması həm əkin sahələrinin suvarılmasını, həm də kənd sakinlərinin içməli su təminatının yaxşılaşmasını təmin edər”.
Elman Məmmədov həmçinin 2026-cı ilin dövlət və icmal büdcələri haqqında qanun layihəsini yüksək qiymətləndirib:
“Bu büdcə ölkənin gələcək uğurlu inkişafını tam təmin edəcək həqiqi qanun layihəsidir. Əminəm ki, deputat həmkarlarım bu layihəni yekdilliklə dəstəkləyəcəklər. Hökumət isə büdcənin icrasında uğurla fəaliyyət göstərəcəkdir”.
Afər Ziyadqızı
