Avropa İttifaqının (Aİ) xarici siyasət xidmətinin rəhbəri Kaya Kallas İrəvanda keçirilən Avropa Siyasi İcmasının sammiti çərçivəsində Ermənistanın Avropa İttifaqına (Aİ) üzvlük perspektivlərinə münasibət bildirib.
"Operativ Məlumat Mərkəzi-OMM"-in xəbərinə görə, o qeyd edib ki, bu məsələdə qərarı İrəvan özü verməlidir. Kallasın sözlərinə görə, Avropa perspektivi masadadır və bir aydan sonra ölkədə seçkilər keçiriləcək.
Bundan əvvəl Ermənistan xarici işlər nazirinin müavini Vahan Kostanyan bildirmişdi ki, onlar 2028 və ya 2030-cu illərdə respublikanın Avropa İttifaqına üzv olacağına inanacaq qədər sadəlövh deyillər.
Digər tərəfdən, Rusiyanın baş nazir müavini Aleksey Overçuk İrəvanı xəbərdar edərək, Aİ-nin Rusiyaya qarşı aqressiv köklənmiş hərbi-siyasi bloka çevrildiyini nəzərə almağın vacibliyini vurğulamışdı.
Aprelin 1-də Moskvada Ermənistanın baş naziri Nikol Paşinyan və Rusiya prezidenti Vladimir Putin arasında danışıqlar baş tutub. Görüş zamanı Putin İrəvanda Aİ ilə münasibətlərə dair müzakirələri gördüklərini və buna sakit yanaşdıqlarını ifadə edib. Bununla belə, Rusiya lideri Ermənistanın eyni vaxtda həm Avropa İttifaqı, həm də Avrasiya İqtisadi İttifaqında (Aİİ) təmsil olunmasının qeyri-mümkünlüyünü açıq şəkildə diqqətə çatdırıb.
Öz növbəsində, Paşinyan bu iki quruma üzvlüyün bir araya sığmadığını bildiklərini, lakin hələlik seçim etmək məcburiyyətində qaldıqları nöqtəyə çatmadıqlarını söyləyib.
