Hazırda icarə əsasında "Bavariya" forması geyinən hücumçu Nikolas Cekson yay transfer pəncərəsində "Çelsi"yə geri dönəcək.
"Operativ Məlumat Mərkəzi-OMM" "The Athletic" nəşrinə istinadən xəbər verir ki, Münhen təmsilçisi seneqallı futbolçunun transfer hüquqlarını birdəfəlik almaqdan imtina edib.
Bununla belə, London klubunun da onu əsas heyətdə saxlamaq niyyətində olmadığı bildirilir.
London təmsilçisinin rəhbərliyi forvardın satışından 60 milyon avroya qədər gəlir əldə edə biləcəyini düşünür. Müqayisə üçün bildirək ki, məşhur "Transfermarkt" portalı 24 yaşlı oyunçunun bazar dəyərini 40 milyon avro olaraq qiymətləndirir.
Bu mövsüm "Bavariya"nın heyətində ümumilikdə 30 rəsmi matça çıxan Cekson 10 qol vurmağı və 4 məhsuldar ötürmə ilə yadda qalmağı bacarıb.
Əlavə olaraq xatırladaq ki, gənc hücumçunun "Çelsi" ilə mövcud müqaviləsinin müddəti 2033-cü ilə qədər qüvvədədir.
