Səfərbərlik və Hərbi Xidmətə Çağırış üzrə Dövlət Xidmətinin Sabunçu rayon idarəsinin sabiq rəisi, polkovnik Rövşən Babayev barəsindəki hökmdən verilmiş şikayətə baxılıb.
"Operativ Məlumat Mərkəzi-OMM" xəbər verir ki, Bakı Apellyasiya Məhkəməsində hakim İlqar Murquzovun sədrliyi ilə keçirilən iclasda birinci instansiya məhkəməsinin hökmü dəyişdirilib.
Qərara əsasən, Rövşən Babayevə əvvəl təyin olunmuş 4 həbs cəzası 3 ilə endirilib.
Qeyd edək ki, Rövşən Babayev və onunla birgə ittiham olunan şəxslər barəsində Baş prokuror yanında Korrupsiyaya qarşı Mübarizə Baş İdarəsində cinayət işi başlanıb.
İttihama görə, Rövşən Babayev 2016-2019-cu illərdə Səfərbərlik və Hərbi Xidmətə Çağırış üzrə Dövlət Xidmətinin Bakı şəhər Sabunçu rayon idarəsinin rəisi işləyərkən həmin idarənin Həqiqi hərbi xidmətə çağırış şöbəsinin baş zabiti vəzifəsində işləmiş Yaşar Hüseynov, habelə Bakı şəhəri 3 nömrəli Şəhər Klinik Xəstəxanasının tibb işçiləri və digər şəxslərlə qabaqcadan əlbir olan bir qrup şəxs halında 11 nəfər çağırışçının hərbi xidmətə cəlb edilməməsi üçün ümumilikdə onlardan 22 min 800 manat pulu rüşvət qismində tələb edib.
Rövşən Babayev, Yaşar Hüseynov və digərləri barəsində Cinayət Məcəlləsinin 311.3.1 (rüşvət alma-qabaqcadan əlbir olan bir qrup şəxs tərəfindən törədildikdə), 311.3.2-ci (rüşvət alma-təkrar törədildikdə) maddələri ilə cinayət işi başlanıb.
Bakı Hərbi Məhkəməsinin hökmü ilə Rövşən Babayevə 4 il, Yaşar Hüseynova 3 il həbs, digər təqsirləndirilən şəxslərə isə sınaq müddəti seçilməklə şərti cəza verilib.
