OMM Redaksiyası
Azərbaycan Avropadan gələn turistlərin sayını artırmaq üçün hava əlaqələrini genişləndirməyə və ölkənin beynəlxalq turizm istiqaməti kimi tanınmasını gücləndirməyə çalışır. Bu məqsədə xidmət edəcək Brüssel–Bakı birbaşa reyslərinin 2027-ci ilin mayında başlanması planlaşdırılır.
“Azərbaycan Hava Yolları” Brüssel hava limanı ilə Bakı arasında həftədə dörd uçuş həyata keçirəcək. Birbaşa marşrut paytaxtlar arasındakı səfər müddətini beş saatdan aşağı salacaq və hazırda əsasən İstanbul üzərindən həyata keçirilən bağlantılı uçuşlara alternativ yaradacaq.
Azərbaycan Turizm Bürosunun rəhbəri Florian Sengstşmid yeni aviareysin Avropadan daha çox ziyarətçi cəlb etməyə və ölkənin turizm istiqaməti kimi tanınmasına töhfə verə biləcəyini bildirib.
Turizm hazırda Azərbaycanın iqtisadiyyatına təxminən 3,5 milyard avro (4 milyard dollar) gəlir gətirir. Bu, ölkənin ümumi daxili məhsulunun təxminən 5,4 faizinə bərabərdir.
Rəsmilər ziyarətçilərin sayını və turizm gəlirlərini artırmaqla sektorun iqtisadiyyata töhfəsini 2030-cu ilədək təxminən 6 milyard avroya (6,8 milyard dollar) çatdırmağı hədəfləyirlər. Strategiya çərçivəsində Bakıdan kənardakı məkanlar və təcrübələr, o cümlədən qış idmanı, şərab turizmi və mədəni irs abidələri təbliğ olunur.
Beynəlxalq tədbirlər də Azərbaycanın xaricdə tanınmasına dəstək verir. Bakıda keçirilən son Formula 1 yarışı ölkəyə təxminən 17 min xarici ziyarətçi cəlb edib.
Turizm rəsmiləri birbaşa uçuşların Avropadan Azərbaycana səfəri asanlaşdıracağını, turistlərin ölkədə daha uzun müddət qalmasına və müxtəlif bölgələrə səyahət etməsinə şərait yaradacağını gözləyirlər.
Afinala və Sürixə mümkün birbaşa uçuşlar da daxil olmaqla, Avropanın digər şəhərləri ilə aviareyslər açmaq məsələsi nəzərdən keçirilir. Rəsmilər hava şəbəkəsinin genişləndirilməsinin turizm sektorunun davamlı inkişafına və Azərbaycanın Avropa ziyarətçiləri üçün daha əlçatan istiqamətə çevrilməsinə kömək edəcəyinə ümid edirlər.
