Bakı-Astara dəmir yolu xəttində modernizasiya işlərinin 2028-ci ilə qədər tamamlanması planlaşdırılır.
“Operativ Məlumat Mərkəzi-OMM”-in məlumatına görə, bu barədə Bakı və ətraf bölgələrdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramının ötən il üzrə icrasına həsr olunan dəyirmi masa zamanı Rəqəmsal İnkişaf və Nəqliyyat Nazirliyinin müavini Rəhman Hümmətov açıqlama verib.
R.Hümmətov bildirib ki, modernizasiya başa çatdıqdan sonra həmin istiqamətdə sərnişin daşımaları həyata keçiriləcək. Nazir müavini əlavə edib ki, Astara istiqamətində bəzi yolların vəziyyəti əlavə təmir işlərini tələb edir:
“Ötən ilin sonunda Rusiya ilə imzalanmış saziş çərçivəsində 'Şimal-Cənub' nəqliyyat dəhlizinin inkişafı və mövcud xəttin modernizasiyası nəzərdə tutulub. Biz işlər tamamlanmadan və təhlükəsizlik tam təmin edilmədən sərnişin daşımalarının başlanmasının tərəfdarı deyilik. Lakin 2028-ci ilə qədər xəttin modernizasiyasını yekunlaşdırmağı planlaşdırırıq və həmin vaxtdan etibarən sərnişin qatarlarının hərəkəti mümkün olacaq. Hazırda yeganə məhdudiyyət yolun cari vəziyyətidir və təhlükəsizlik baxımından modernizasiya başa çatmadan sərnişin qatarlarını buraxmaq düzgün deyil”.
Modernizasiya işləri Bakı-Astara istiqamətində nəqliyyatın təhlükəsiz və rahat şəkildə fəaliyyət göstərməsinə imkan yaradacaq, həmçinin “Şimal-Cənub” dəhlizinin əhəmiyyətini artıracaq.
