Milli Məclisin Elm və təhsil komitəsinin sədr müavini, Böyük Britaniya və Şimali İrlandiya Birləşmiş Krallığı ilə parlamentlərarası əlaqələr üzrə işçi qrupunun rəhbəri Fariz İsmayılzadə, rəhbərlik etdiyi qrup adından britaniyalı həmkarlarına mühüm müraciət ünvanlayıb. Məktub Birləşmiş Krallıq parlamentinin üzvləri Baronessa Helena Kennedi, Brendan O'Hara və Cessika Mordenə göndərilib.
“Operativ Məlumat Mərkəzi-OMM”-in məlumatına görə, müraciətdə Azərbaycanın beynəlxalq səviyyədə tanınmış ərazilərində mövcud olmuş keçmiş cinayətkar və separatçı rejimlə bağlı Birləşmiş Krallıq parlamentində başladılan araşdırma təşəbbüsündən ciddi narahatlıq və məyusluq ifadə olunub.
Separatizm Araşdırması Sülh Prosesinə Zərbədir?
Məktubda xüsusi olaraq vurğulanıb ki, belə bir təşəbbüs hazırda Azərbaycan və Ermənistan arasında irəliləyən sülh prosesinə ciddi zərbə vura bilər. Qeyd edək ki, bu sülh prosesi Böyük Britaniya hökuməti tərəfindən də yüksək səviyyədə dəstəklənir.
Müraciətdə xatırladılıb ki, Azərbaycan torpaqlarının Ermənistan tərəfindən 30 ildən artıq davam edən qanunsuz işğalı və 1 milyona yaxın azərbaycanlının doğma yurd-yuvasından didərgin düşməsi ilə nəticələnən ağır mərhələ artıq geridə qalıb. Hazırda tərəflər ABŞ və Avropalı tərəfdaşlarının dəstəyi ilə sülh danışıqlarında real irəliləyiş əldə etməkdədir.
Bildirilir ki, mövcud olmayan separatçı rejimlə bağlı keçirilməsi nəzərdə tutulan dinləmələrin radikal, sülhə qarşı çıxan diaspor qruplarının və lobbi dairələrinin yanlış məlumatlarına əsaslanması ehtimalı böyükdür və bu, təxribat xarakteri daşıyır.
Cənubi Qafqazda Revanşizmə Yer Yoxdur
Fariz İsmayılzadə bəyan edib ki, Cənubi Qafqazda revanşizmə yer yoxdur. Tərəflər birgə səylərlə sülhün möhkəmləndirilməsi və müharibə siyasətinə qayıdışın qarşısının alınması istiqamətində fəaliyyət göstərməlidirlər.
Sonda Böyük Britaniya Parlamentinə sözügedən araşdırma təşəbbüsünün ləğv edilməsi ilə bağlı çağırış edilib. Azərbaycan parlamentinin üzvləri britaniyalı həmkarlarının bu məsələdə dəstəyinə inanır və iki ölkə arasında davam edən strateji tərəfdaşlığın regionda sülh prosesinə əlavə töhfə verəcəyinə ümid bəsləyirlər.
