Azərbaycanın qadın güləşçisi Ruzanna Məmmədova Serbiyanın Novi Sad şəhərində keçirilən 20 yaşlılar arasında Avropa çempionatında qızıl medal qazanıb.

Azərbaycan Güləş Federasiyasından "Operativ Məlumat Mərkəzi-OMM"-ə verilən məlumata görə, 59 kiloqram çəkidə yarışan R. Məmmədova finalda rusiyalı Yelena Kurova ilə üz-üzə gəlib. Gərgin mübarizə şəraitində keçən görüş qarşılıqlı xallarla keçib. Əzmkarlıq göstərən güləşçimiz yekunda 14:10 hesablı qələbə ilə Avropa çempionu olub.

Elvina Kərimzadə (50 kiloqram) təsəlliverici görüşdə bolqarıstanlı Emine Osmandan güclü olub – 6:3. Ancaq bürünc medal uğrunda qarşılaşmada finlandiyalı Roberta Luostarinenə uduzub – 0:10.

Nərgiz Səmədova (55 kiloqram) təsəlliverici görüşdə polşalı Nikola Vişnievskanı “tuş”la mübarizədən kənarlaşdırıb. Həmyerlimiz üçüncü yer uğrunda həlledici qarşılaşmada rusiyalı Yekaterina Çikanovaya məğlub olub – 1:8.

Fatimə İsayeva (68 kiloqram) təsəlliverici görüşdə polşalı Karolina Domaşuka müqavimət göstərə bilməyib – 0:10.

Azərbaycan badmintonu tarixində ilk dəfə airbadminton üzrə Federasiya Kuboku keçirilib.

"Operativ Məlumat Mərkəzi-OMM"  xəbər verir ki, Dünya Badminton Federasiyası, Gənclər və İdman Nazirliyi və Azərbaycan Badminton Federasiyasının birgə təşkilatçılığı ilə qarışıq-qoşa kateqoriyası üzrə açıq havada airbadminton yarışı təşkil olunub.

Bakı Avropa Oyunları Parkında keçirilən yarışın qalibi Cahid Əlhəsənov-Həcər Nuriyeva tandemi olub. Rəvan Niftəliyev-Nigar Səmədova cütlüyü ikinci, Teymur Abbasov-Zülfiyyə Abbasova və Əli Gözəlov-Fatimə Həsənzadə dueti isə üçüncü pillədə qərarlaşıb.

5 iyul - Ümumdünya Badminton Gününə həsr olunan Federasiya Kubokunun qalibləri diplom medal və hədiyyələrlə təltif ediliblər.

Azərbaycan Basketbol Federasiyasının (ABF) Zuğulba tədris idman bazasında yerli hakimlər üçün təşkil etdiyi seminara yekun vurulub.

"Operativ Məlumat Mərkəzi-OMM" federasiyanın mətbuat xidmətinə istinadən xəbər verir kİ, FİBA dərəcəli hakim və Azərbaycan basketbol hakimləri komitəsinin sədri Ələkbər Həsənovun rəhbərliyi ilə təşkil olunmuş seminarda, yerli hakimlərin bilik və bacarıqları həm nəzəri, həm də praktiki cəhətdən daha da təkmilləşdirilib.

Qeyd edək ki, hakimlər üçün bu və digər tipli seminarların növbəti mərhələsinin keçirilməsi sentyabr ayı üçün planlaşdırılır.

Azərbaycanın sərbəst güləş millisi Serbiyanın Novi Sad şəhərində keçirilən 17 yaşlılar arasında Avropa çempionatına birinci olub.

Azərbaycan Güləş Federasiyasından "Operativ Məlumat Mərkəzi-OMM"-ə verilən məlumata görə, qitə birinciliyində 2 qızıl, 2 gümüş, 2 bürünc medal qazanan yeniyetmələrdən ibarət sərbəst güləş millimiz 160 xal toplayaraq komanda hesabında çempion olub.

Yığmamız ikinci pillədəki Ermənistanı 36 xal qabaqlayıb. Türkiyə (119 xal) isə üçüncü yeri tutub.

Xatırladaq ki, Muhamməd İsmayılov (51 kiloqram) və İsa Yusibov (65 kiloqram) qızıl, Hüseyn İsmayılovla (60 kiloqram ) Muxamad Qantemirov (110 kiloqram) gümüş, Hacıhüseyn Əhmədzadə (48 kiloqram) və Hüseyn Hüseynov (55 kiloqram) isə bürünc medal qazanıblar.

Azərbaycan karateçisi Rahib Əzim (+76 kq) Xorvatiyanın Poreç şəhərində keçirilən Karate 1 Liqa yarışında qızıl medal qazanıb.

"Operativ Məlumat Mərkəzi-OMM" xəbər verir ki, təmsilçimiz 21 yaşadək idmançıların mübarizəsində fəxri kürsünün ən yüksək pilləsində qərarlaşıb.

Komandamıza bu yarışda Azərbaycan Karatate Federasiyasının baş katibi Qabil Sayadov və gənclərdən ibarət yığmanın baş məşqçisi Anar Allahverdiyev rəhbərlik edir.

Azərbaycan güləşçiləri Serbiyanın Novi Sad şəhərində keçirilən U-17 Avropa çempionatında uğurlu başlayıblar.

Bu barədə "Operativ Məlumat Mərkəzi-OMM"-ə Azərbaycan Güləş Federasiyasının mətbuat xidmətindən məlumat verilib.

İlk yarış günündə 48, 55, 65, 80 və 110 kq-da yer alan yunan-Roma güləşçiləri xalçaya çıxıblar.

Əmrah Əmrahov (48 kq) yunanıstanlı Pavlos Tsentidisə və ermənistanlı Andranik Xaçatryana eyni hesabla (9:0) qalib gələrək yarımfinala yüksəlib. Əmrah yarımfinalda isveçli Santoş Sarmalinqama da aman verməyib – 6:0. Əmrahov sabah finalda rusiyalı Nikolay Kristovla qarşılaşacaq.

Əli Nəzərov (55 kq) startda ermənistanlı Aleksandr Aydoyevi məyus edib – 5:0. Daha sonra serbiyalı Kristian Dobiyə tam üstünlüklə (9:0) qalib gələn həmyerlimiz adını yarımfinala yazdırıb. Əli finalın bir addımlığında bolqarıstanlı Alyoşa İliyevə sonuncu xal prinsipinə görə (1:1) məğlub olub və sabah bürünc medal uğrunda güləşəcək.

İsbəndiyar İmanov (65 kq) latviyalı Yaromirs Jukovsu vaxtından əvvəl (8:0), estoniyalı Robi Kristyuhanı isə sonuncu xal prinsipinə əsasən (1:1) mübarizədən kənarlaşdırıb. İmanov 1/4 finalda almaniyalı Kevin Karlla bacarmayıb – 4:12.

Orxan Hacıyev (80 kq) yunanıstanlı Vasileyos Semertzidisə tam üstünlüklə (10:1) qalib gəldikdən sonra 1/4 finalda serbiyalı Duşan Stokiçdən güclü olub – 6:1. Hacıyev yarımfinalda sonuncu xal prinsipinə əsasən (5:5) türkiyəli Yiğit Sarıya məğlub olduğu üçün ümidini bürünc medala bağlayıb.

Mikayıl İsmayılov (110 kq) finlandiyalı Aleksandr Saramaekini vaxtından əvvəl (9:0) yolundan kənarlaşdırıb. O, 1/4 finalda gürcüstanlı Luka Şavadze üzərində qələbə qazanıb – 4:1. Təəssüf ki, milli üzvü yarımfinalda ukraynalı İvan Yankovskiyə uduzub – 0:8. Mikayıl da sabah üçüncü yer uğrunda mübarizə aparacaq.