"5 avqust tarixində məzuniyyətdə olarkən Brüssel vaxtı ilə saat 15:00-da Belçikada yaşadığım evin qarşısında mən və xanımım naməlum 2 nəfər tərəfindən hücuma məruz qaldıq. Bu şəxslər biz binanın girişindən içəri girərkən zorla içəri soxularaq, bizi silah və bıçaqla hədələyərək, üzərlərimizdəki əşyaların onlara verilməsini tələb etmişlər".
"Operativ Məlumat Mərkəzi-OMM" xəbər verir ki, bunu Azərbaycan Respublikasının NATO yanında Nümayəndəliyinin başçısı Cəfər Hüseynzadə Brüsseldə ona qarşı hücumla bağlı APA informasiya agentliyinin müxbirinin sualına cavabında deyib.
"Onlar xanımımın çantasını və qollarımızdakı rolex model saatları götürərək, bizə yüngül xəsarət yetirərək ərazidən kənarlaşmışlar. Polis dərhal əraziyə gələrək, hadisənin araşdırılmasına başlamışdır. Polis tərəfindən verilmiş məlumata əsasən hal-hazırda cinayətkarların məsuliyyətə cəlb edilməsi məqsədilə müvafiq istintaq tədbirləri davam etdirilir. Həmçinin qeyd edim ki, Belçika mətbuatında yaşadığımız binanın şəkillərinin dərc olunması təhlükəsizlik səbəbindən qəbuledilməzdir. Qarət edilən saatlarımızın qiymətinin mətbuatda hədsiz dərəcədə və dəfələrlə şişirdilməsi də təəssüf doğurur. Bizə məxsus saatlar rolex markalı olsa da onlar metalik və sadə modellər olub. Bu hücum hadisəsi barədə həmçinin Belçika tərəfinə rəsmən səfirliyimiz tərəfindən müraciət edilib və diplomatların toxunulmazlığının təmin olunması və onlara qarşı bu kimi hücumların qarşısının alınması üçün Diplomatik əlaqələr haqqında Vyana Konvensiyası çərçivəsində tədbirlər görülməsi tələb olunub", - açıqlamada qeyd olunub.
***
Azərbaycanın NATO missiyasının rəhbəri Cəfər Hüseynzadə və həyat yoldaşı Brüsseldə qarət edilib.
"Operativ Məlumat Mərkəzi-OMM" xəbər verir ki, bu barədə "Sudinfo.be" məlumat yayıb.
Jurnalistlərin sözlərinə görə, hücum edənlər cütlüyün başına tapança ilə zərbələr endirib və onların 90 min avro dəyərində olan "Rolex" saatını alıblar.
Hüseynzadə 2022-ci ilin oktyabrında Azərbaycanın NATO missiyasının rəhbəri təyin edilib.
