2023-cü ildə Azərbaycanda əlavə dəyər vergisi (ƏDV) daxilolmalar 7 207,3 milyon manat proqnoza qarşı icra 8 127,7 milyon manat (920,4 milyon manat və yaxud 12,8 % çox), 2022-ci il müqayisədə isə 1 181,5 milyon manat və yaxud 17 % çox icra olunub.

"Operativ Məlumat Mərkəzi-OMM" bu barədə "2023-cü il dövlət büdcəsinin icrası haqqında" qanun layihəsinə istinadən xəbər verir.

Məlumata görə, bu tədiyyə növü üzrə daxil olan vəsaitin 95,4 %-i və yaxud 7 757,5 milyon manat qeyri-neft sektorunun, 4,6 %-i və yaxud 370,3 milyon manatı neft sektorunun payına düşüb.

ƏDV üzrə daxilolmalarda ölkədaxili əməliyyatların payı 3 147 milyon manat proqnoza qarşı 3 684,2 milyon manat (537,2 milyon manat və yaxud 17 % çox), gömrük orqanlarının payı isə 4 060,3 milyon manat proqnoza qarşı 4 443,6 milyon manat (383,3 milyon manat və yaxud 9,4 % çox) təşkil edib.

Azərbaycan Prezidenti İlham Əliyevin 12 iyun 2024-cü il tarixli 165 nömrəli Sərəncamı ilə Bəhruz Fərman oğlu Bəhramov Azərbaycan Respublikası Dövlət Neft Fondunun (ARDNF) İcraçı direktorunun müavini vəzifəsinə təyin edilib.

Bu barədə "Operativ Məlumat Mərkəzi-OMM"-ə ARDNF-dən məlumat verilib.

Bildirilib ki, Bəhruz Bəhramov 2020-ci ildən hazırki tarixədək ARDNF-nin İcraçı direktorunun müşaviri vəzifəsini icra edib. Daha öncə ARDNF-nin Risklərin idarə edilməsi və İnvestisiya departamentlərində müxtəlif vəzifələrdə, o cümlədən, 2014-2016-cı illərdə Risklərin idarə edilməsi departamentinin direktor müavini, 2016-2020-ci illərdə Risklərin idarə edilməsi departamentinin direktoru vəzifəsində çalışıb.

Birinci rübdə əmtəə ixracı 27,1 faiz azalaraq 6,2 milyard dollar təşkil edib.

"Operativ Məlumat Mərkəzi-OMM" Mərkəzi Banka istinadla xəbər verir ki, dövr ərzində əsasən dünya neft-qaz bazarlarında formalaşan müxtəlif istiqamətli meyllər şəraitində neft-qaz sektoru üzrə ixracın həcmi 5,5 milyard dollar olub. İxrac olunmuş neft-qaz məhsullarının (5,5 milyard dollar) 3,8 milyard dolları xam neftin, 1,6 milyard dolları təbii qazın, 107 milyon dolları isə neft emalı məhsullarının payına düşür.

Cari ilin I rübü üzrə qeyri-neft-qaz ixracı 26,2 faiz azalaraq 663,6 milyon dollar olub.

Hesabat dövrü üzrə əmtəə idxalı 6,6 faiz azalaraq 3,5 milyard dollar təşkil edib, o cümlədən istehlak mallarının idxalının ümumi dəyəri isə 1,5 milyard dollar olub ki, bunun da 0,5 milyard dolları ərzaq məhsullarının payına düşür. Qeyri-neft-qaz sektoru üzrə idxal 3,3 faiz artaraq 3 milyard dollar olub. Qeyri-neft-qaz idxalının strukturunda metalların (31,2 faiz), bitki yağlarının (24,9 faiz), şəkərin (15,6 faiz), kərə yağının (14,8 faiz), minik avtomobillərinin (13,7 faiz), ətir və kosmetik vasitələrinin (11,1 faiz), alkoqollu və alkoqolsuz içkilərinin (9,4 faiz), tərəvəz məhsullarının (2,5 faiz) və tütün məhsullarının (0,5 faiz) idxalı artıb. Bu dövrdə, gəmilər, qayıqlar və üzən konstruksiyaların (63,2 faiz), daxiliyanma mühərriklərinin (44,3 faiz), dənli bitkilərin (41,6 faiz), əczaçılıq məhsullarının (36,2 faiz), ağac məmulatlarının (8,7 faiz), mebel məhsullarının (8,3 faiz), daş və şüşə məmulatlarının (8 faiz), kağız məmulatlarının (6,3 faiz) və sabun və yuyucu vasitələrinin (4,1 faiz) idxalı isə azalıb.

İdxalın strukturunda xarici investisiyalar hesabına gətirilmiş maşın-avadanlıqların və malların xüsusi çəkisi 3,4 faiz təşkil edərək 121 milyon dollar olub.

Bu ilin yanvar-aprel aylarında Azərbaycan iqtisadiyyatında muzdla çalışan işçilərin orta aylıq nominal əməkhaqqı əvvəlki ilin müvafiq dövrünə nisbətən 10,2 % artaraq 1 007,5 manat təşkil edib.

"Operativ Məlumat Mərkəzi-OMM" Dövlət Statistika Komitəsinə istinadən xəbər verir ki, iqtisadiyyatın mədənçıxarma sənayesi, maliyyə və sığorta fəaliyyəti, peşə, elmi və texniki fəaliyyət, informasiya və rabitə, eləcə də nəqliyyat və anbar təsərrüfatı sahələrində orta aylıq nominal əməkhaqqı daha yüksək olub.

Bu il mayın 1-nə ölkə iqtisadiyyatında muzdla çalışan işçilərin sayı 1 749,7 min nəfər olub, onlardan 897 min nəfəri iqtisadiyyatın dövlət sektorunda, 852,7 min nəfəri isə qeyri-dövlət sektorunda fəaliyyət göstərib.

Muzdla işləyənlərin 19 %-i təhsil, 18,7 %-i ticarət; nəqliyyat vasitələrinin təmiri, 12,8 %-i sənaye, 8,4 %-i əhaliyə səhiyyə və sosial xidmətlərin göstərilməsi, 6,7 %-i tikinti, 6,4 %-i dövlət idarəetməsi və müdafiə; sosial təminat, 4,2 %-i nəqliyyat və anbar təsərrüfatı, 3,8 %-i peşə, elmi və texniki fəaliyyət, 3,3 %-i kənd təsərrüfatı, meşə təsərrüfatı və balıqçılıq, 2,2 %-i maliyyə və sığorta fəaliyyəti, 14,5 %-i isə iqtisadiyyatın digər sahələrində məşğul olublar.

Nazirlər Kabineti “Standartlaşdırma üzrə texniki komitələrin yaradılması və fəaliyyətinin təşkili Qaydaları”nı təsdiqləyib.

"Operativ Məlumat Mərkəzi-OMM" xəbər verir ki, bununla bağlı Baş nazir Əli Əsədov yeni qərar imzalayıb.

Qərara əsasən, iqtisadi fəaliyyətin hər növü üzrə bir texniki komitə yaradılacaq.

Texniki komitənin fəaliyyətinin təşkili və istiqamətləri, eləcə də onun sədrinin, müavininin, katibinin və üzvlərinin funksiyaları, kargüzarlığın aparılma qaydası, altkomitələrin yaradılması və onların fəaliyyətinin təşkili qaydası, həmçinin illik iş planının hazırlanması və razılaşdırılması proseduru müvafiq dövlət standartı və texniki komitənin əsasnaməsi ilə müəyyən edilir.

İş planının layihəsinə aşağıdakı məlumatlar daxil edilir:

- standartın beynəlxalq təsnifat kodu;

-standartın işlənilib hazırlanması üçün əsas;

- dövlət standartının və ilkin dövlət standartının layihələrinin adı;

- əsas normativ baza;

- işin yerinə yetirilməsi müddəti;

- maliyyə mənbəyi;

- sifarişi verən təşkilat;

- dövlət standartının potensial istifadəçiləri;

- təşəbbüslə çıxış edən şəxslər tərəfindən nəzərdə tutulan digər məsələlər.

Azərbaycanın 2024-cü il üzrə daxili dövlət borclanmasının yuxarı həddinin (limiti) 2,3 milyard manatdan 2,7 milyard manata çatdırılması, xarici dövlət borclanmasının yuxarı həddinin (limiti) isə 1,7 milyard manat saxlanılması nəzərdə tutulur.

"Operativ Məlumat Mərkəzi-OMM" bu barədə Maliyyə Nazirliyinə istinadən xəbər verir.

Bundan başqa, il ərzində veriləcək dövlət zəmanətlərinin məbləğinin yuxarı həddinin (limiti) 0,7 milyard manatdan 1,1 milyard manata çatdırılması planlaşdırılır.