Ağdərə rayonu bərpa edildiyinə görə 97 saylı seçki dairəsinin adı dəyişdirilib.

"Operativ Məlumat Mərkəzi-OMM" xəbər verir ki, bununla bağlı Mərkəzi Seçki Komissiyasının bu gün keçirilən iclasında qərar qəbul edilib.

MSK sədrinin müavini Rövzət Qasımov deyib ki, komissiya təmsilçilik baxımından bütün rayonların ölkə parlamentində təmsil olunması üçün müəyyən uyğunlaşdırmalar aparılmalıdır. Ona görə də Ağdərə rayonunun adı 97 saylı seçki dairəsinin adına əlavə edilir.

Beləliklə, seçki dairəsi bundan sonra 97 saylı Tərtər-Ağdərə-Goranboy adlandırılacaq.

Eyni zamanda Xocalı şəhərinə əhalinin qayıdışı ilə bağlı 118 saylı Ağdam şəhər seçki dairəsinin də adı dəyişdirilib və Ağdam-Xocalı seçki dairəsi adlandırılıb.

Bundan başqa, 124 saylı seçki dairəsinin adından Xocalı çıxarılıb və yeni adı ilə Şuşa-Ağdam-Xocavənd adlandırılıb.

Adları dəyişdirilən seçki dairələri:

96 saylı Goranboy - 96 saylı Goranboy-Naftalan seçki dairəsi

97 saylı Tərtər-Naftalan-Goranboy - 97 saylı Tərtər-Ağdərə-Goranboy seçki dairəsi

118 saylı Ağdam şəhər - 118 saylı Ağdam-Xocalı seçki dairəsi

119 saylı Ağdam kənd - 119 saylı Ağdam seçki dairəsi

124 saylı Şuşa-Ağdam-Xocalı-Xocavənd seçki dairəsi - 124 saylı Şuşa-Ağdam-Xocavənd seçki dairəsi.

İyunun 29-da Mərkəzi Seçki Komissiyasında (MSK) növbədənkənar parlament seçkiləri ilə əlaqədar iclas keçirilir.

"Operativ Məlumat Mərkəzi-OMM" xəbər verir ki, MSK-nın sədri Məzahir Pənahovun sədrliyi ilə keçirilən iclasda “Azərbaycan Respublikasının Milli Məclisinə növbədənkənar seçkilərin hazırlanıb keçirilməsi üzrə əsas hərəkət və tədbirlərin Təqvim Planı” təsdiqlənəcək, MSK-nın nəzdində ekspert qrupu və işçi qrupu yaradılacaq. Eyni zamanda, iclasda imza vərəqələrində, habelə namizədlərin, siyasi partiyaların, siyasi partiya bloklarının təqdim etdikləri sənədlərdə olan məlumatların düzgünlüyünü və müvafiq məlumatları yoxlamaq üçün işçi qrupu yaradılması və tərkibinin müəyyənləşdirilməsi, bəzi dairə seçki komissiyalarının tərkibində dəyişiklik edilməsi məsələləri müzakirə olunacaq.

Bununla da MSK parlament seçkilərinə rəsmən start verir.

Qeyd edək ki, iyunun 20-də Yeni Azərbaycan Partiyasının (YAP) İdarə Heyətinin iclasında YAP-ı Milli Məclisdə təmsil edən deputatlara altıncı çağırış Milli Məclisin buraxılması və növbədənkənar seçkilərin təyin edilməsi barədə Azərbaycan Respublikasının Prezidentinə müraciət olunması üçün təşəbbüs göstərmələrinin tövsiyə olunması barədə qərar qəbul edilib.

Milli Məclisin iyunun 21-də keçirilən plenar iclasında YAP deputatlarının təşəbbüsü müzakirə olunub, qərar qəbul edilib. Deputatlar parlamentin buraxılması və növbədənkənar seçkilərin təyin olunması ilə əlaqədar Azərbaycan Prezidentinə müraciət ediblər.

İyunun 27-də Konstitusiya Məhkəməsinin Plenumunun iclası keçirilib və iclasın yekununda Milli Məclisin buraxılmasının Konstitusiyaya uyğun olması barədə qərar verilib.

İyunun 28-də Milli Məclisin növbədənkənar sessiyasının sonuncu plenar iclası keçirilib və VI çağırış Milli Məclis işini yekunlaşdırıb.

Prezident İlham Əliyevin iyunun 28-də “Altıncı çağırış Azərbaycan Respublikası Milli Məclisinin buraxılması və Azərbaycan Respublikasının Milli Məclisinə növbədənkənar seçkilərin təyin edilməsi haqqında” Sərəncam imzalayıb. Sərəncama əsasən, Milli Məclisinə növbədənkənar seçkilər 2024-cü il sentyabrın 1-nə təyin edilib.

Azərbaycanda bir sıra vəzifəli şəxslərin qulluq stajına görə əmək pensiyasına əlavələrin hesablanması qaydası dəyişib.

"Operativ Məlumat Mərkəzi-OMM" xəbər verir ki, bu, Prezident İlham Əliyevin iyunun 29-da “Əmək pensiyaları haqqında” qanuna dəyişikliyi imzalaması ilə mümkün olub.

Dəyişiklik əmək pensiyası yaşına çatmış və ya bu yaşa çatanadək orqanizmin funksiyalarının 81-100 faiz pozulmasına görə əlilliyi müəyyən edilmiş sabiq deputatlar, Mərkəzi Seçki Komissiyasının (MSK) və Naxçıvan Muxtar Respublikası MSK-nın üzvü kimi azı səlahiyyət müddətinin yarısı qədər sığorta stajı olan MSK və Naxçıvan MSK-nın üzvləri, İnsan hüquqları üzrə müvəkkil (Ombudsman) və Naxçıvan Ombudsmanı kimi azı səlahiyyət müddətinin yarısı qədər sığorta stajı olan Ombudsman və Naxçıvan Ombudsmanı və Hesablama Palatasının üzvü kimi azı səlahiyyət müddətinin yarısı qədər sığorta stajı olan Hesablama Palatasının üzvlərinə şamil olunacaq.

Həmin şəxslər üçün 2024-cü il iyulun 1-dən pensiyaya əlavələrin təyinatında pensiya təyinatı tarixinədək əməkhaqqındakı sonrakı artımlar da nəzərə alınmaqla səlahiyyət müddəti ərzində müvafiq vəzifə üzrə aldığı əməkhaqqının orta aylıq məbləğinin 80 faizi miqdarı prinsipi əsas götürüləcək. Eyni zamanda bu şəxslərə “Əmək pensiyaları haqqında” qanunun 2024-cü il iyulun 1-dək qüvvədə olan normaları tətbiq ediləcək.

Biləsuvar rayonunun sabiq icra başçısı Mahir Quliyevin həbs müddəti azaldılıb.

"Operativ Məlumat Mərkəzi-OMM" xəbər verir ki, hakim Teyyub Muxtarovun sədrliyi ilə Ali Məhkəmədə keçirilən prosesdə onun cəzası 8 il 3 aya endirilib.

Xatırladaq ki, M.Quliyev Dövlət Təhlükəsizliyi Xidməti (DTX) tərəfindən keçirilən əməliyyatla həbs olunub.

O, Cinayət Məcəlləsinin 179-cu (mənimsəmə və israf etmə), 308.1-ci (vəzifə səlahiyyətlərindən sui-istifadə etmə), 311.3.2-ci (təkrar rüşvət alma) və 313-cü (vəzifə saxtakarlığı) maddələri ilə təqsirli bilinərək, Lənkəran Ağır Cinayətlər Məhkəməsinin hökmü ilə 11 il azadlıqdan məhrum edilib. Hökmə əsasən, Mahir Quliyevin 2 mənzili və 1 avtomobili dövlət nəfinə müsadirə olunub. Şirvan Apellyasiya Məhkəməsi hökmü qüvvədə saxlayıb.

Bu ilin sonuna kimi Xocavəndə 53 ailənin köçürülməsi nəzərdə tutulub.

"Operativ Məlumat Mərkəzi-OMM"-in məlumatına görə, bunu Ağdam, Füzuli və Xocavənd rayonlarında Prezidentin xüsusi nümayəndəsi Emin Hüseynov Şuşada “Sahibkarlar üçün yeni imkanlar: Qarabağı birlikdə quraq" adlı tədbirdə çıxışı zamanı deyib.

Onun sözlərinə görə, Xocavənd şəhərinə bitişik kənd Xocavənddə də hazırda təmir işləri aparılır.

Azərbaycanın işğaldan azad edilmiş ərazilərində həyata keçirilməsi təklif edilən bir sıra investisiya layihələri açıqlanıb.

"Operativ Məlumat Mərkəzi-OMM"-in əldə etdiyi məlumata görə, layihələr bir sıra sahələri əhatə edir.

Farfordan dekorativ mətbəx məhsullarının istehsalı müəssisəsinin qurulması ilə bağlı layihənin dəyəri 25 milyon manatdır. Layihə çərçivəsində farfordan dekorativ mətbəx məhsulları istehsalı müəssisəsinin yaradılması nəzərdə tutulur. Ölkədə bu sahədə istehlak məhsullarının idxal payı yüksəkdir, ölkədə yerli istehsal azdır. Müəssisənin istehsal gücü illik 18 milyon ədəd təşkil edir.

Digər layihə santexnika məhsullarının istehsalı müəssisəsinin qurulmasıdır. Layihənin dəyəri 20 milyon manatdır. Bu sahə üzrə ölkə üzrə istehlakın 100 %-i idxal hesabına həyata keçirilir. 2022-ci il üzrə idxal 20 milyon ABŞ dolları olub.

Təklif edilən digər layihə şəxsi sanitar məmulatların istehsalıdır.

Yerli xammaldan istifadə edərək və daxili tələbatı nəzərə alaraq Ağdam Sanaye Parkı ərazisində şəxsi sanitar məmulatların istehsalı təklif edilir. Bu zaman kaolin (kaolinite) gili, əhəng daşı, kvars qumu və qırmızı gilə olan tələbatın daxili istehsal, sahə şpatı, rəngli şirə və digər maddələrə olan tələbatın isə idxal hesabına ödənilməsi nəzərdə tutulur. Layihənin dəyəri 17 milyon manatdır.