OMM Redaksiyası
Azərbaycan Ukraynaya enerji infrastrukturunun bərpası və qış mövsümünə hazırlıq üçün növbəti humanitar yardım partiyası göndərib.
Energetika Nazirliyinin təqdim etdiyi yardım Prezident İlham Əliyevin 2026-cı il sentyabrın 21-də imzaladığı sərəncama uyğun olaraq hazırlanıb. Ukraynanın müraciəti əsasında formalaşdırılan yükə kabellər, naqillər, transformatorlar və digər elektrik avadanlıqları daxildir. Yardımın ümumi dəyəri 2,5 milyon manatdır.
Humanitar yük oktyabrın 7-də Sumqayıt Texnologiyalar Parkından yola salınıb.
Ukraynanın Azərbaycandakı səfiri Yuriy Husyev jurnalistlərə bildirib ki, göndərilən elektrik avadanlıqları ölkəsinin qış mövsümünə hazırlığı baxımından mühüm əhəmiyyət daşıyır.
Səfirin sözlərinə görə, Rusiyanın hücumları nəticəsində Ukraynanın enerji sisteminə ciddi ziyan dəyib və yardım həmin şəraitdə xüsusi əhəmiyyət kəsb edir.
Azərbaycan daha əvvəl də Ukraynaya elektrik enerjisi təchizatının bərpasına dəstək məqsədilə humanitar yardım göndərib. Ukrayna Prezidenti Volodimir Zelenski bu dəstəyə görə təşəkkürünü bildirib.
