“Prezident İlham Əliyevin rəhbərliyi altında bu gün Azərbaycan çevik xarici siyasət həyata keçirir və burada energetika, nəqliyyat, qaz və boru kəmərləri ilə bağlı davamlı olaraq müxtəlif müzakirələr aparılır”.
Bunu "Operativ Məlumat Mərkəzi-OMM"-ə açıqlamasında milli məclisin deputatı Ceyhun Məmmədov bildirib.
Deputat qeyd edib ki, son dövrlər Azərbaycan xarici siyasətində çox ciddi dəyişikliklər baş verib:
“Bu baxımdan İlham Əliyevin Bosniya və Herseqovinaya səfər etməsi, orada keçirdiyi görüşlər, ümumiyyətlə, bu ölkənin Azərbaycanda səfirlik açması, iki ölkə arasında strateji tərəfdaşlıq haqqında sənədlərin imzalanması bir daha onu göstərir ki, Azərbaycan qarşısına qoyduğu məqsədlərə və hədəflərə çatmaq üçün bütün lazımi addımları atır”.
Millət vəkili qeyd edib ki, bütün bu addımlar imkan verir ki, Azərbaycan özünün xarici siyasətinin balanslaşdırsın, daha da gücləndirsin, yeni əməkdaşıq əlaqələri və münasibətləri quraraq özünün tərəfdaşlarının sayını artırsın.
Bu kimi səfərlərin iqtisadi, siyasi, xarici əlaqələrin daha da güclənməsinə mühüm tövhə verəcəyini bildirən Ceyhun Məmmədov Prezidentin Bosniya səfərini də aparılan uğurlu siyasətin növbəti davamı kimi qeyd edib.
Məlik Məlikov