Avqustun 22-də Tacikistan Ali Məhkəməsi sədrinin 1-ci müavini Amirxon İşoqinin rəhbərlik etdiyi nümayəndə heyəti Azərbaycanın Ali Məhkəməsində olub.
"Operativ Məlumat Mərkəzi-OMM" xəbər verir ki, bu barədə Ali Məhkəmədən məlumat verilib.
Bildirilib ki, Azərbaycanın Ali Məhkəmənin sədr müavini Çingiz Əsgərov qonaqları salamlamaqdan məmnunluğunu ifadə edib. Görüşdə qonaqlara Azərbaycan Prezidenti İlham Əliyevin rəhbərliyi ilə ölkəmizdə aparılan məhkəmə-hüquq islahatları, Ali Məhkəmənin fəaliyyəti, vahid məhkəmə təcrübəsinin formalaşdırılması istiqamətində görülən işlər barədə məlumat verilib.
Qeyd edilib ki, Azərbaycanın Ali Məhkəməsi ədalət mühakiməsinin səmərəliliyinin artırılmasında mühüm rol oynayır, rəqəmsallaşma və süni intellektin məhkəmə sisteminə inteqrasiyası istiqamətində fəal işlər aparır.
Nümayəndə heyətinin rəhbəri Amirxon İşoqi isə öz növbəsində yüksək qonaqpərvərliyə görə təşəkkürünü bildirib və Azərbaycanda məhkəmə-hüquq sahəsində həyata keçirilən islahatları yüksək qiymətləndirib.
Bildirilib ki, Azərbaycan və Tacikistan arasında digər istiqamətlərdə olduğu kimi, məhkəmə-hüquq sahəsində də əməkdaşlıq uğurla inkişaf edir.
Görüşdə, həmçinin qarşılıqlı maraq doğuran məsələlər və gələcək əməkdaşlıq perspektivləri müzakirə edilib.
Sonra qonaqlar Ali Məhkəmənin inzibati binası ilə tanış olublar.
